काठमाडौं । स्वास्थ्य बीमा बोर्डले स्वास्थ्य बीमा कार्यक्रम अन्तर्गतको सुविधा दुरुपयोग नगर्न स्वास्थ्य सेवा प्रदायक संस्थालाई सचेत गराएको छ। बोर्डले आइतबार सार्वजनिक सूचना प्रकाशन गर्दै स्वास्थ्य बीमा कार्यक्रमको विधि र नियमावली विपरित उपचार र खर्च दाबी भइरहेको पाइएकाले दाबी भुक्तानी नदिने चेतावनी समेत दिएको छ।
सेवाग्राहीलाई स्वास्थ्य सेवा प्रदान गर्दा ऐन नियम तथा सुविधा थैली र कार्यविधि अनुसार गरेको नपाइएकाेले दाबी मूल्याङ्कन तथा भुक्तानी गर्ने कार्यमा कठिनाई हुने भन्दै बोर्डले नियमानुसार मात्र सेवा प्रदान गर्न स्वास्थ्य संस्थालाई सचेत गराएको छ।
बोर्डले जारी गरेको ३ बुँदे निर्देशनमा बीमा कार्यक्रम अन्तर्गत बीमितको उपचार गर्दा रोगको निदान अनुसारको अनुसन्धान गरेको हुनुपर्ने र सोही व्यहोरा चिकित्सकको पूर्जामा उल्लेख गरेको हुनुपर्ने उल्लेख गरिएको छ । यसैगरी तालिमप्राप्त रेडियोलोजिष्टबाट मात्र अल्ट्रा सोनोग्राफी(युएसजी) गरिएको हुनुपर्ने र बिरामीलाई अन्यत्रको अस्पतालमा उपचारका लागि स्वास्थ्य नियमावलीमा उल्लेख भएको अनुसूची ९ अनुसारको फारम अनिवार्य भर्न समेत स्वास्थ्य संस्थालाई अनुरोध गरिएको छ।
निदान अनुसारको जाँच र औषधी उपचार नगरिएको पाइए बिरामीको उपचारवापतको खर्चको सोधभर्ना नदिने बोर्डले जनाएको छ।
