काठमाडौं । बीमा कम्पनीहरुले दोस्रो बजारमा सूचिकृत कम्पनीको साधारण शेयर तथा संस्थापक शेयरमा २१ अर्ब ५७ करोड रुपैयाँ लगानी गरेका छन् । दोस्रो बजारमा सजिलै खरिद बिक्री हुने सर्वसाधारण शेयरमा मात्रै बीमा कम्पनीहरुले १० अर्ब ४२ करोड रुपैयाँ लगानी गरेका छन् । त्यस्तै दोस्रो बजारमा सूचिकृत कम्पनीको संस्थापक शेयरमा ११ अर्ब १४ करोड रुपैयाँ लगानी गरेका छन् । बीमा कम्पनीहरुले सर्वसाधारण शेयरमा भन्दा पनि संस्थापक शेयरमा अधिक लगानी गरेका छन् ।
बीमा कम्पनीहरु मध्ये सर्वाधिक धेरै नेपाल लाइफले मात्रै शेयर बजारमा ४ अर्ब १६ करोड रुपैयाँ लगानी गरेको छ । जसमा सर्वसाधारण समुह तर्फको शेयरमा २ अर्ब ४९ करोड र संस्थापक शेयरमा एक अर्ब ६७ करोड रुपैयाँ लगानी गरेको छ ।
दोस्रो धेरै लाइफ इन्स्योरेन्स कर्पोरेसनको २ अर्ब ७० करोडको लगानी छ । जसको सर्वसाधारण शेयरमा एक अर्ब ३२ करोड छ भने संस्थापक समुहको शेयरमा एक अर्ब ३८ करोड रुपैयाँ लगानी छ । तेस्रो धेरै राष्ट्रिय बीमा संस्थानको २ अर्ब ३४ करोड लगानी छ । संस्थाले सबैभन्दा धेरै संस्थापक शेयरमा २ अर्ब १५ करोड लगानी गरेको छ ।
एशियन लाइफले पनि दोस्रो बजारमा ७६ करोड २५ लाख र संस्थापक समुहको शेयरमा ८२ करोड ३० लाख रुपैयाँ लगानी गरेको छ । नेशनल लाइफको सर्वसाधारण समुहको शेयरमा ३६ करोड १८ लाख रुपैयाँ रहेको छ भने संस्थापक समुहको शेयरमा एक अर्ब एक करोड रुपैयाँ लगानी छ । सर्वसाधारण समुहको शेयरमा खासै लगानी नरहेको नेपाल पुनर्बीमाको संस्थापक समुहको शेयरमा भने एक अर्ब लगानी रहेको छ । सर्वसाधारण समुहको शेयरमा प्रभु लाइफको आक्रामक लगानी छ । प्रभुले ४३ करोड ७९ लाख रुपैयाँ लगानी गरेको छ ।
निर्जीवन तर्फ सबैभन्दा धेरै सगरमाथाको ४२ करोड २२ लाख रुपैयाँको लगानी छ । कम्पनीले सर्वसाधारण समुहको शेयरमा २५ करोड ३४ लाख र संस्थापक समुहको शेयरमा १६ करोड ८७ लाख रुपैयाँ लगानी गरेको छ । त्यस्तै अर्को निर्जीवन बीमा कम्पनी शिखरले शेयर बजारमा ४१ करोड ५६ लाख रुपैयाँ लगानी गरेको छ । कम्पनीले सर्वसाधारण समुहको शेयरमा मात्रै २० करोड ६१ लाख रुपैयाँ लगानी गरेको छ ।
