काठमाडौं । एनएलजी इन्स्योरेन्स कम्पनीले आर्थिक वर्ष २०७६/७७ को मुनाफाबाट चुक्ता पूँजीको १० प्रतिशत बोनस शेयर दिने घोषणा गरेको छ । कम्पनीको आज साढे तीन बजेदेखि ५ बजेसम्म बसेको सञ्चालक समितिको बैठकले १० प्रतिशत बोनस शेयर र बोनस शेयरमा लाग्ने कर प्रयोजनका लागि ०.५२६३ प्रतिशत नगद लाभांस वितरण गर्ने प्रस्ताव गरेको हो ।
सञ्चालक समितिले एनएफआरएस अनुसार तयार भएको वित्तीय विवरण पारित गर्दै स्वीकृतिका लागि बीमा समितिमा पेश गर्ने निर्णय गरेको छ । बीमकको वित्तीय विवरण सम्बन्धी निर्देशन २०६६ अनुसार कम्पनीको मुनाफा २६ करोड ५५ लाख रुपैयाँ रहेको छ । तर एनएफआरएस अनुसार तयार पारिएको वित्तीय विवरण अनुसार भने २५ करोड ९४ लाख रुपैयाँ मुनाफा आर्जन गरेको छ ।
एनएफआरएस अनुसार वित्तीय विवरण तयार गर्दा नियामकीय प्रावधान अनुसार जगेडा तथा व्यवस्थाहरु कायम गर्नु पर्ने भएकोले सो अनुसार कायम गरी आर्थिक वर्ष २०७६/७७ को संचित मुनाफा ११ करोड ९५ लाख रुपैयाँ रहन आएको हुँदा आर्थिक वर्ष २०७६/७७ को लागि बीमा समितिको स्वीकृति प्राप्त भए अनुसार हुने गरी उक्त लाभांस प्रस्ताव गरेको हो ।
हाल कम्पनीको चुक्ता पूँजी एक अर्ब ९ करोड रुपैयाँ रहेको छ । प्रस्तावित १० प्रतिशत बोनस शेयर वितरण पछि भने एक अर्ब २० करोड रुपैयाँ पुग्नेछ ।
कम्पनीले अघिल्लो आर्थिक वर्षको भन्दा ३ प्रतिशतले लाभांस बृद्धि गरेको छ । पूँजी बृद्धि पछि गत आर्थिक वर्षमा लाभांस घटे पनि कम्पनीले विस्तारै लाभांस दर बढाउने देखिएको छ । दोस्रो बजारमा सोमबार कम्पनीको शेयर मूल्य ११९३ रुपैयाँ छ । आज लाभांस घोषणा गर्नु अगाडि कम्पनीको शेयर मूल्य भने ४० रुपैयाँले घटेको हो ।
