काठमाडौं । शेयर बजारमा हालै कारोबारमा आएको हाथवे इन्भेस्टमेन्टका लगानीकर्ताहरु मालमाल भएका छन्।
आज यो समाचार तयार पार्दासम्म हाथवेको शेयरभाउ प्रतिकित्ता ७५०.३० रुपैयाँमा कारोबार भइरहेको छ। यो बेलासम्म यो कम्पनीको शेयरभाउ ६८.२० रुपैयाँ अर्थात १० प्रतिशतले बढेको छ।
दोस्रो बजारमा कारोबारमा आएदेखि यो कम्पनीको शेयरभाउ लगातार बढिरहेको छ। यो कम्पनीले ५० अंकित मूल्यमा आइपीओ बिक्री खुला गरेको थियो। आजको मूल्यसँग तुलना गर्ने हो भने यो कम्पनीका आइपीओ परेको शेयर किनेर होल्ड गरिरहेकाहरुले आफ्नो लगानीमा १५ गुणा बढी अर्थात १४००.६ प्रतिशत रिटर्न पाइसकेका छन्।
गत असोज २४ गतेबाट हाथवेको शेयर दोस्रो बजारमा कारोबारमा आएको थियो। यो कम्पनीको शेयर प्रतिकित्ता २८५.२ रुपैयाँमा पहिलो कारोबार भएको थियो। पहिलो कारोबारमै लगानीकर्ताले ४७० प्रतिशतभन्दा बढी रिटर्न पाएका थिए।
