काठमाडौं । सिन्धुपाल्चोक जिल्लाभित्र कार्यरत रहेका ५०० भन्दा बढि चिकित्सक, नर्स, अहेब, कार्यालय सहयोगी लगायतको कोरोना बीमा हुने भएको छ । पूर्व सञ्चार मन्त्री तथा नेपाली कांग्रेसका नेता मोहन बहादुर बस्नेतको संयोजनमा सिन्धुपाल्चोक जिल्लामा कार्यरत स्वास्थ्यकर्मीको कोरोना बीमा गर्न लागिएको हो ।
पूर्व मन्त्री बस्नेतले कोरोना महामारीको समयमा स्वास्थ्यकर्मीको मनोबल उच्च राख्ने उद्देश्यले सबै स्वास्थ्यकर्मीको कोरोना बीमा गर्न लागिएको बताए । नेपाली कांग्रेसका केन्द्रीय सदस्य बस्नेतले भने, ‘जनताको जीवन रक्षामा खटिने स्वास्थ्यकर्मीको उत्साह बढाउन र जोखिम न्यूनिकरण गर्न बीमा गर्ने निर्णय गरेका हौं ।’
प्रतिव्यक्ति एक लाख रुपैयाँ बीमाङ्कको कोरोना बीमा गर्न स्वास्थ्यकर्मीहरुको सूचि तयार गर्ने काम भइरहेको उनले बताए । पूर्व मन्त्री बस्नेतको संयोजनमा तीन लाख भन्दा बढि बीमा शुल्क लाग्ने बीमाको लागि पहल भएको हो । उनले भने, ‘खर्च व्यहोर्ने अरु साथीहरु पनि खोजेको छु, हामीले सामूहिक रुपमा सबै चिकित्सकहरुको कोरोना बीमा गर्न लागेका हौं ।’
