इनुसा कोइराला
वित्तीय विवरण बुझाएको लामो समयसम्म पनि बीमा समितिले स्वीकृति नगरेको बीमा कम्पनीहरुले आरोप लगाएका छन् । बीमा समितिले कम्पनी अनुसार फरक फरक खालको व्यवहार गरेर नियतबश नै वित्तीय विवरण रोकिदिने गरेको कम्पनीहरुको गुनासो छ ।
कम्पनी भन्छ समितिले स्वीकृत गर्दैन वित्तीय विवरण
समिति भन्छ नेपालमा बीमांकी नहुँदा ढिलाई भएको हो
विवरण बुझाएको सात महिना वित्तिसक्दा पनि समितिले वेवास्ता गरेको एक कम्पनीका प्रमुख कार्यकारी अधिकृतले बताए । ‘हामीले गत कात्तिकमा नै वित्तीय विवरण बीमा समितिको टेबुलमा पुराएका हौ । तर, अहिलेसम्म कुनै प्रतिक्रिया आएको छैन,’ उनले भने । समितिले आफुले रुचाएका कम्पनीलाई फरक खालको व्यवहार गर्ने गरेको उनले बताए ।
बीमा समितिले समयमा नै वित्तीय विवरण पारित नगर्दा कम्पनीहरुले साधारण सभा गर्न पाएका छैनन । साधारण सभा हुन नसक्दा कम्पनीहरुले बोनशदर र लाभांश समेत वितरण गर्न पाएका छैनन् ।
तर, बीमा समितिले भने बीमा कम्पनीहरुको वित्तीय विवरण पारित गर्ने प्रक्रिया लामो भएकै कारण समय लागेको बताएको छ । कम्पनीबाट प्राप्त भएको विवरण समितिको बिमांकीले पारित गरेपछि मात्रै स्वीकृति हुने बीमा समितिका कार्यकारी निर्देशक राजुरमण पौडेलले बताए ।
बीमा समितिका अनुसार बीमा कम्पनीहरुले तयार पारेको वित्तीय विवरण कम्पनीको बीमांकीले स्वीकृत गर्नुपर्छ । नेपालमा बीमांकी नभएकै कारण कम्पनीले भारत लगायतका मुलुकमा रहेको बीमांकीलाई वित्तीय विवरण परिक्षणका लागि पठाउँछ । कम्पनीको बीमांकीले पारित गरेपछि विवरणलाई बीमा समितिमा पठाउँछ । समितिले पुन आफनो बीमांकीलाई कम्पनीको वित्तीय विवरण पठाउँछ ।
समितिको बीमांकी भारतमा रहेकोले केही समय लाग्ने समितिको भनाई छ । समितिको बीमांकीले स्वीकृत गरे मात्रै समितिले कम्पनीको वित्तीय विवरणलाई पारित गर्छ । अन्यथा पुन परिमार्जन गर्नुपर्छ । सोही प्रक्रिया दोहोरिन्छ ।
नेपालमा बीमांकी नभएकै कारण कम्पनीहरुको वित्तीय विवरण स्वीकृतमा ढिलाई हुने गरे पनि केही कम्पनीको हकमा भने समितिले जानाजान ढिलाई गर्ने गरेको कम्पनीहरुको दाबी छ ।
