काठमाडौं । भरतपुर विमानस्थमा प्रतिस्पर्धी श्री एयरलाइन्सले ठूलो जहाजमार्फत् उडान शुरू गर्ने भएपछि बुद्ध एयरले पनि ठूलो विमान प्रयोगमा ल्याउने भएको छ ।
धावनमार्गको सीमित लम्बाइका कारण एटिआर ४२ मार्फत् बुद्ध एयरले ४२ सिटे विमानबाट काठमाडौं भरतपुर काठमाडौं रूटमा एकलौटीरूपमा सेवा प्रदान गर्दै आएको थियो । विमानस्थलको धानवमार्गको लम्बाइ १ हजार २ सय मिटर मात्र छ ।
श्री एयरले ८० सिट क्षमता भएको ड्यास ४-८०० विमानमार्फत् उडान शुरू गर्दैछ । बुद्धले पनि ७२ सिट क्षमताको एटिआर ७२ मार्फत् उडान भर्ने जानकारी दिएको छ ।
धावनमार्गको लम्बाइ पर्याप्त नभएका कारण यो धावनमार्गमा अवतरणका क्रममा ७० जनासम्म यात्रु काठमाडौंबाट बोकेर लैजान सकिने भएपनि उडानका क्रममा बढीमा ५५ जनासम्म यात्रु मात्र बोक्न सकिने प्राविधिकले बताएका छन् ।
विमानस्थलसँग जोडिएको नेपाली सेनाको ब्यारेकलाइ अन्यत्र स्थानान्तरण गरेर भरतपुर विमानस्थलको धावनमार्ग बिस्तार र रात्री उडान सेवाको समेत पूर्वाधार विकासका लागि नागरिक उड्ययन प्राधिकरणले ४ अर्ब रूपैयाँ लगानी गर्ने तयारी गरेको छ। ठेक्का प्रकृया पुरा गर्न समय लाग्ने भएकाले निर्माण कार्य सन् २०२५ देखि शुरू हुने अनुमान गरिएको छ।
