काठमाडौं। शंकर समूह अन्तर्गतको जगदम्बा मोटर्सले गत आर्थिक वर्षमा १३ अर्ब ६२ करोड रुपैयाँ बराबरको कारोबार गरेको छ । अघिल्लो आर्थिक वर्षको तुलनामा गत आर्थिक वर्षमा कारोबार रकममा ३.६९ प्रतिशतको झिनो सुधार भएको छ ।
अघिल्लो आव(२०२१) मा जगदम्बा मोटर्सले १३ अर्ब १३ करोड ५० लाख रुपैयाँ बराबरको कारोबार गरेको थियो । शंकर समूह अन्तर्गतको जगदम्बा मोटर्सले नेपालमा टिभिएस ब्राण्डको मोटरसाइकल, स्कुटर र प्रोटोन ब्राण्डको चारपाङग्रे सवारीसाधन(कार, जीप) र एडएनओसी लुब्रिकेन्ट बिक्री गर्दै आएको छ । जगदम्बा मोटर्सले गत वर्षदेखि दुई पाङग्रे र तीन पाङग्रे सवारी साधन बाराको सीमरामा एसेम्बलिङ(तयारी पार्टपूर्जा जोडजाड गरेर मोटरसाइकल उत्पादन गर्ने) समेत शुरु गरेको छ ।
वित्तीय बजारमा तरलता अभावका साथै बजारमा पर्याप्त प्रतिस्पर्धीहरुको उपस्थितिका कारण जगदम्बा मोटर्सले कारोबारलाई बिस्तार गर्न चुनौती खेप्नुपरेको अवस्था छ । यसबाहेक जगदम्बा मोटर्समा उच्च व्यवस्थापन तहमा पछिल्लो समय किचलो समेत चलिरहेको सम्बद्ध श्रोतले जानकारी दिएको छ ।
जगदम्बा मोटर्सको दुई चक्के सवारीसाधनको बजारमा २० प्रतिशत र तीन चक्केमा ३० प्रतिशत बजार हिस्सा रहेको इन्फोमेरिक्स नेपाल ले जारी गरेको प्रेस विज्ञप्तीमा उल्लेख छ ।
रेटिङ एजेन्सी इन्फोमेरिक्स नेपालका अनुसार जगदम्बा मोटर्सले ४२ करोड दीर्घकालीन सहित कूल् ५ अर्ब २० करोड रुपैयाँ बैंक कर्जाको लागी क्रेडिट रेटिङ गराएको छ । यो रेटिङ अनुसार दीर्घकालीन कर्जाको लागी ‘त्रिपल बी प्लस’ र अल्पकालीन कर्जाकाे लागी ‘आइआरएन एटु रेटिङ’ प्राप्त गरेको छ ।
जगदम्बा मोटर्सको ब्याज चुक्ता अनुपात ५.९९ रहेकाले बैंक कर्जाको ब्याज भुक्तानी गर्नको लागी सहज अवस्थामा रहेको रेटिङमा उल्लेखित तथ्यांकले इंगित गरेको छ । साथै कूल कारोबारमा इबिआइडिटिए(ब्याज,कर,ह्रासकट्टी, साँवा चुक्ता पूर्वको आय)को हिस्सामा अघिल्लो आवको तुलनामा ७.३५ प्रतिशतले सुधार गरेर १५.७६ प्रतिशत पु¥याउन सफल भएको छ ।
निर्जीवन बीमा कम्पनीहरुकाे लागी जगदम्बा माेटर्स, सिप्रदी, माेरंग अटाे, लक्ष्मी हुण्डाई, ज्याेती ग्रुपले गर्ने काराेबार बीमाशुल्क आम्दानीकाे मुख्य श्राेत हाे । निर्जीवन बीमाशुल्ककाे ३० प्रतिशतभन्दा बढी हिस्सा सवारीसाधनकाे बीमावापत प्राप्त हुने बीमाशुल्क आम्दानीमा निर्भर रहेकाे छ।
