गृह मन्त्री राम बहादुर थापा “बादल” ले नेपालमा रेडक्रसको कानुनी आधार सुदृढीकरणको लागि छिटो गृहकार्य सक्न नेपाल रेडक्रस सोसाइटीलाई परामर्श दिएको छ ।नेपाल रेडक्रसको नवगठित तदर्थ केन्द्रीय कार्यसमितिका पदाधिकारी र सदस्यहरुसँग सिंहदरबारमा शुक्रबारको भेटमा गृहमन्त्री थापाले –“नेपाल रेडक्रसलाई कानुनी हिसाबले मिलाउने र व्यवस्थित गर्ने कुरा नेपाल सरकारको प्राथमिकतामा छ ।”
सो अवसरमा नेपाल रेडक्रसका अध्यक्ष डा. विश्व केशर मास्केले कानुनी आधार बलियो बनाउन मस्यौदाको लागि काम सुरु गरिसकेको जानकारी दिए । रेडक्रसमा लामो अनुभव भएका व्यक्तिहरु बर्तमान नेतृत्वमा रहेकाले छिटो छरितो कार्य हुने कुरामा गृहमन्त्री थापा आशाबादी देखीएको छ ।
नेरेसोको टोलीले शुक्रबार नै गृह सचिव प्रेम कुमार राईसँग छुट्टै भेट गरेको थियो । सो भेटमा तीन महिना अगावै कानुनको मस्यौदाको काम सक्न नेरेसोका अध्यक्ष डा.मास्केको नेतृत्वको टोलीलाई आग्रह गरेका छन् । राइले : “रेडक्रस जस्तो सँस्थालाई व्यवस्थित गर्न कुरेर बस्ने अवस्था छैन् । नेपाल सरकारको तर्फबाट पूर्ण सहयोग हुनेछ । तर समयरेखा अनुसार गर्नुपर्ने काममा ढीलाई नहुने व्यवस्था मिलाउनु महत्वपूर्ण छ ।”
