काठमाण्डौ । मानुषी लघुवित्त वित्तीय संस्थाको ७ लाख बढी कित्ता शेयरको आउँदो भदौ ७ गतेदेखि लकइन अवधि सकिने भएको छ।
मानुषी लघुवित्तले एक सूचना जारी गर्दै शेयरको लकइन अवधि सकिनेबारे जानकारी गराएको हो। हाल संस्थाका संस्थापक शेयरधनीको ७ लाख कित्ता र कर्मचारीको ५ हजार ४६९ कित्ता गरी कुल ७ लाख ५ हजार ४६९ कित्ता शेयरको लकइनमा राखिएको छ।
मानुषी लघुवित्तले २०७८ साउन २७ गतेदेखि साउन ३१ गतेसम्म सर्वसाधारण (कर्मचारीसहित) लाई आइपीओ बिक्री गरेको थियो। आइपीओ २०७८ भदौ ७ गते बाँडफाँट गरिएको थियो।
सर्वसाधारणका लागि निष्कासन गरी बाँडफाँड गरिएको मितिले ३ वर्ष समाप्त नभएसम्म संस्थापक शेयरधनीले धारण गरेको र कर्मचारीलाई बाँडफाँट गरिएको शेयर लकइनमा राख्नुपर्ने व्यवस्था छ। सोहीबमोजिम मानुषी लघुवित्तले पनि उक्त शेयर लकइनमा राखेको छ।
संस्थाको संस्थापक शेयर सदस्यमध्ये सञ्चालक सदस्यमा रहेका व्यक्ति तथा संस्थाको उच्च तहमा रहेका कर्मचारीले भने शेयर खरिदबिक्री गर्न नपाउने संस्थाले स्पष्ट पारेको छ।
मानुषी लघुवित्तको शेयर रजिस्ट्रारमा नेपाल एसबीआई मर्चेन्ट बैंकिङ रहेको छ।
