काठमाडौं । भ्रमण भिसामा विदेश जान लागेका २४६ जनाको कागजात नक्कली फेला परेको छ।
काठमाडौं उपत्यका अपराध अनुसन्धान कार्यालयका अनुसार सरकारी कर्मचारीकै संलग्नतामा संगठित रुपमा यसरी नक्कली कागजात बनाई मानिसलाई भ्रमण भिसामा विदेश पठाउने गरेको पाइएको छ। यसरी मिलेमतोमा विदेसिएका अधिकांश त्यहाँ घुम्नका लागि नभई कामका लागि जाने गरेको कार्यालयको ठहर छ।
प्रहरीले शंकास्पद कागजातसहित गएको असोजदेखि नै अनुसन्धान थालेको थियो। त्यस क्रममा १ हजार ५१२ जनाका कागजात अध्ययन गर्दा २४६ कागजात प्रमाणपत्र, श्रम, नाता प्रमाणित, प्रहरी रिपोर्ट र बैंक विवरणलगायतका कागजात नक्कली पाइएको कार्यालयले जनाएको छ।
अनुसन्धानका क्रममा सरकारी कर्मचारीसहित, एजेन्ट, कन्सल्टेन्सी, ट्राभल एजेन्सीहरुले एयरलाइन्सलाई प्रतिव्यक्ति १० हजार रुपैयाँदेखि १५ हजार रुपैयाँ र अध्यागमनका कर्मचारीलाई प्रतिव्यक्ति ४० रुपैयाँदेखि ५५ हजार रुपैयाँ दिएर मिलेमतोमा मिलाई पठाउने गरेको पाइएको प्रहरीले जनाएको छ। मिलेमतोमा संलग्न एजेन्ट, ट्राभल्स, एयरलाइन्स र अध्यागमनका कर्मचारीसहित ३५ जनाभन्दा बढीलाई प्रहरीले विभिन्न मितिमा पक्राउ गरी संगठित अपराध, लिखतसम्बन्धी कसुरसमेतका अपराधमा आवश्यक कारबाही थालिसकेको छ।
