बैशाख महिनामा १२ अर्बले निक्षेप भित्रिदा कर्जा प्रवाह १० अर्बले घट्यो

काठमाडौं । बाणिज्य बैंकमा तरलता बढ्दै जान थालेको छ । बाणिज्य बैंकहरुले बैशाख महिनामा १२ अर्ब ७३ करोड रुपैयाँ निक्षेप संकलन गर्दा कर्जा विस्तार भने १० अर्ब ७६ करोड रुपैयाँले घटेको छ ।

समिक्षा अवधिमा बाणिज्य बैंकहरुले ४८ खर्ब ४० अर्ब रुपैयाँ निक्षेप संकलन गरेका छन् भने यहि अवधिमा ४२ खर्ब ९८ अर्ब रुपैयाँ कर्जा विस्तार गरेका छन् । जवकी चैत महिनामा बाणिज्य बैंकहरुले ४३ खर्ब ९ अर्ब रुपैयाँ कर्जा लगानी गरेका थिए ।

चालु आर्थिक वर्षको बैशाख मसान्तसम्ममा भने कर्जा प्रवाह एक खर्ब २३ अर्बले कर्जा विस्तार भएको छ । यहि अवधिमा २ खर्ब ९९ अर्बले निक्षेप बढेको छ । यस वर्ष बाणिज्य बैंकहरुले सिडि रेसियो टाइट हुँदा नयाँ कर्जा प्रवाह गर्न पाएनन् । जव कर्जा प्रवाह गर्न सक्ने अवस्था आयो त्यतिवेला आर्थिक मन्दीका कारण नयाँ कर्जा प्रवाह गर्नै सकेनन् ।

जेठ महिनाको पहिलो ५ दिनमा पनि निक्षेप संकलन ११ अर्ब ३८ करोडले बढ्यो भने कर्जा प्रवाह २ अर्ब १० करोडले खुम्चियो । गएको बैशाख पहिलो साता कर्जा प्रवाह १९ अर्ब ९९ करोड रुपैयाँले घटेको थियो ।