काठमाडौं । नेपाल इन्भेष्टर्स फोरमले लगानीकर्ताको भावना र मर्म विपरित एकतर्फी रुपमा तरलताको संकट देखाउदै सम्पुर्ण लगानीको क्षेत्रलाई असर गर्ने गरी अत्याधिक बृद्धि गरिएको व्याजदरको यथासिघ्र पुनरावलोकन गर्न अनुरोध गरेको छ ।
पूँजी बजारको दिगो विकास र विस्तारले मात्रै देशको अर्थतन्त्र, उद्योग, कलकारखाना, व्यापार विस्तार हुने हुँदा हालै बैंक वित्तीय संस्थाले सम्पूर्ण उद्योग, कलकारखाना व्यापार र लगानीकर्ताको भावना र मर्म विपरित एकतर्फी रुपमा व्याजदर बढाएको फोरमको तर्क छ ।
विगतमा लगानीका अन्य क्षेत्रहरु सुशुप्त रहेको अवस्थामा विद्यार्थीदेखी शिक्षक, प्राध्यापकसम्म, निजामती कर्मचारीदेखि सेना तथा प्रहरीसम्म गृहणीदेखि सेवा निवृत्त व्यक्तिहरुसम्म, ठुला व्यवसायिक घरानादेखि साना व्यवसायिहरुले आफ्नो बचत तथा ऋण रकमलाई शेयर बजारमा लगानी गरेको अवस्थालाई नबुझी सम्बन्धी निकायले मनलगादी नीति बनाउदा लगानीकर्ताहरु मर्कामा परेको फोरमले जनाएको छ ।
आर्थिक समृद्धि अभियानलाई मुर्तरुप दिन आवस्यक पर्ने स्वेदशी पूँजी निर्माणको निर्विकल्प आधार पूँजीबजार भएको हुनाले पूँजीबजारको विकास र विस्तारको लागि सरोकारवाला पदाधिकारीहरु तथा निकायहरु अझ बढी गम्भिर हुन र यस्तो विषम परिस्थितिमा नेपाल इन्भेष्टर फोरमले सम्पुर्ण लगानीकर्ताहरुलाई संयम र धैर्यता, सुझबुझका साथ लगानी गर्न अनुरोध गरेको छ ।
