काठमाडौं । बैंकिङ प्रणालीमा पैसा थुप्रिएसँगै नेपाल राष्ट्र बैंकलाई तरलता व्यवस्थापन गर्न निकै सकस परेको देखिन्छ। कर्जाको माग बढ्न नसक्दा बैंकिङ प्रणालीमा अधिक तरलता थुप्रिएको छ।
निक्षेप बढेसँगै बैंक तथा वित्तीय संस्थाको अन्तरबैंक ब्याजदर लामो समयदेखि ३ प्रतिशतभन्दा तल रहेको छ। अन्तरबैंक ब्याजदर ३ प्रतिशतभन्दा तल रहँदा राष्ट्र बैंकले तरलता व्यवस्थापन गर्न निक्षेप संकलन उपकरण प्रयोग गर्नुपर्ने हुन्छ।
तरलता व्यवस्थापन गर्न नेपाल राष्ट्र बैंकले यो जेठ महिना लागेयता मात्रै सातौँपटक निक्षेप संकलन उपकरण प्रयोग गरी बैंकिङ प्रणालीबाट पैसा तान्न लागेको छ। भोलि जेठ १८ गते फेरि केन्द्रीय बैंकले बैंकिङ प्रणालीबाट एकैदिन २५ अर्ब रुपैयाँ तान्न लागेको हो। यसका लागि भोलि मध्याह्न १२ बजे बोलकबोल हुने राष्ट्र बैंकले जनाएको छ।
निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन्। यो ७ दिने निक्षेप संकलन उपकरणको जेठ २५ गते साँवा तथा ब्याज भुक्तानी गरिने राष्ट्र बैंकले जनाएको छ।
यसअघि बैंकिङ प्रणालीबाट राष्ट्र बैंकले आज जेठ १७ गते ५० अर्ब रुपैयाँ, जेठ ११ गते ३५ अर्ब रुपैयाँ, जेठ ७ गते १० अर्ब रुपैयाँ, जेठ ४ गते ३५ अर्ब रुपैयाँ, जेठ ३ गते ५० अर्ब रुपैयाँ र जेठ १ गते १० अर्ब रुपैयाँ खिचेको थियो।
राष्ट्र बैंकको पछिल्लो तथ्यांकअनुसार बैंक तथा वित्तीय संस्थाहरुको कुल निक्षेप ६२ खर्ब ६ अर्ब रुपैयाँ र कर्जा प्रवाह ५१ खर्ब २० अर्ब रुपैयाँ रहेको छ। बैंकहरुको औसत सीडी रेसियो ८०.२७ प्रतिशत र अन्तरबैंक ब्याजदर २.९६ प्रतिशत रहेको छ।
