काठमाडौं । स्विस रिले पुनर्बीमा सुरक्षाको बढ्दो मागमा ध्यान केन्द्रित हुने अपेक्षा गरेको छ। किनकि बीमा उद्योगले पुनर्बीमा नवीकरणका बारेमा छलफल गर्न थालेको छ।
स्विस रिमा सम्पत्ति र दुर्घटना पुनर्बीमाका सीईओ उर्स बार्ट्सचीले बीमा उद्योगका चुनौतीहरु गत वर्षसँग मिल्दोजुल्दो भए पनि तीव्र गतिमा बढ्न थालेको बताए। ‘यसले पुनर्बीमाको उच्च मागको नेतृत्व गरेको छ’, उनले भने, ‘बढ्दो प्राकृतिक प्रकोप जोखिम, आर्थिक अनिश्चितता र भूराजनीतिक अस्थिरताको सामना गर्दै पुनर्बीमा बीमा कम्पनीहरुका लागि ठूलो नोक्सानबाट आफूलाई बचाउने प्राकृतिक तरिका हो।’
उच्च सम्पत्ति मूल्य, सहरीकरण र बढ्दो मर्मत लागतका कारण सम्पत्ति र विशेष पुनर्बीमाको माग बढ्दै गएको स्विस रिले जनाएको छ। स्विस रिको रिपोर्टमा प्राकृतिक प्रकोपबाट विश्वका बीमितको क्षति वर्ष २०२३ मा लगातार चौथो वर्ष १०० अर्ब अमेरिकी डलरभन्दा बढी रहेको उल्लेख छ। ‘सन् २०२४ मा पहिलो ६ महिनामा यस्तो क्षति ६० अर्ब डलर पुगेको छ’, प्रतिवेदनमा भनिएको छ, ‘जुन विगत १० वर्षको औसतभन्दा ६२ प्रतिशत बढी हो।’
स्विस रिले इन्जिनियरिङ क्षेत्रमा विशेषगरी नवीकरणीय ऊर्जा परियोजना र निर्माण उद्योगमा पुनर्बीमाको माग बढिरहेको जनाएको छ। साइबर आक्रमण जोखिमबारे सचेतना बढ्दै जाँदा साइबर पुनर्बीमा बजार पनि विस्तार हुने स्विस रिको अपेक्षा छ। –एजेन्सी
