काठमाडौं । नेपाल पुनर्बीमा कम्पनीको साधारण सभाको मिति तय भएको छ । कम्पनीको भदौ ९ गते बसेको संचालक समितिको बैठकले भदौ ३० गते बिहिबार साधारणसभा गर्ने भएको हो । सभा काठमाडौंको कार्की ब्याक्वेटमा गर्ने कम्पनीले जानकारी दिएको छ ।
कम्पनीको आर्थिक वर्ष ७७/७८ को वार्षिक साधारण सभामा कम्पनीले हाल कायम चुक्ता पूँजीको ५ प्रतिशत बोनश र कर प्रयोजनको लागि ० दशमलव २६३२ प्रतिशत नगद गरी कुल ५ दशमलव २६३२ प्रतिशत लाभांश वितरण गर्ने प्रस्ताव पारित गर्नेछ ।
सभाले आर्थिक वर्ष २०७७/७८ को सञ्चालक समितिको वार्षिक प्रतिवेदन उपर छलफल गरी पारित गर्ने, लेखा परीक्षकको प्रतिवेदन सहितको २०७८ असार मसान्तको वासलात, सोही मितिमा समाप्त आर्थिक वर्ष २०७७/७८ को नाफारनोक्सान हिसाब तथा नगद प्रवाह विवरण र सोही अवधिको वित्तीय विवरणसँग सम्बन्धित अनुसूचीहरु छलफल गरी पारित गर्नेछ
सभाले कम्पनी ऐन, २०६३ को दफा १११ अनुसार आर्थिक वर्ष २०७८/७९ को लागि बाह्य लेखापरीक्षकमा टि.आर.उपाध्या एण्ड कम्पनी, चार्टर्ड एकाउन्टेन्ट्स, बानेश्वर, काठमाण्डौलाई नियुक्त गर्ने र पारिश्रमिक निर्धारण गर्नेछ ।
त्यस्तै, सभाले सञ्चालक समितिबाट भएको स्वतन्त्र विज्ञ संचालकको नियुक्ति अनुमोदन गर्ने, कम्पनी ऐन, २०६३ को दफा १०५ को उपदफा (१)(ग) अनुसार सञ्चालक समितिको निर्णय बमोजिम संस्थागत सामाजिक उत्तरदायित्व अन्तर्गतका खर्च गरिएको रकमलाई अनुमोदन गर्नेछ ।
सभामा कम्पनीको प्रबन्धपत्र नियमावलीको प्रस्तावित संशोधनमा नेपाल सरकार वा नियमनकारी निकायहरुबाट कुनै फेरबदलको सुझाव प्राप्त भएमा सो वमोजिम आवश्यक फेरबदल गर्न सञ्चालक समितिलाई अख्तियारी प्रदान गर्ने प्रस्ताव सभामा पेश गर्नेछ ।
हाल कम्पनीको चुक्ता पूँजी ११ अर्ब ६५ करोड रुपैयाँ रहेको छ। प्रस्तावित बोनस शेयर ५८ करोड २५ लाख रुपैयाँ वितरण पछि चुक्ता पूँजी १२ अर्ब २३ करोड रुपैयाँ पुग्नेछ ।
कम्पनीले यस भन्दा अगाडी २०७६/७७ सम्मको मुनाफाबाट १६.५ प्रतिशत बोनश शेयर र २.५ प्रतिशत नगद लाभांश दिएको थियो ।
