काठमाडौं। दुई पुनर्बीमा कम्पनीहरुले विभिन्न क्षेत्रमा २५ अर्ब ८६ करोड रुपैयाँ लगानी गरेका छन् । यस मध्ये सर्वाधिक धेरै बाणिज्य बैंकको मुद्दती निक्षेपमा मात्रै ८१.६८ प्रतिशत रहेको छ । गत असारमा स्थापना भएको हिमालयन रिइन्स्योरेन्स कम्पनीले ७ अर्ब ११ करोड रुपैयाँ लगानी गरेको छ ।
हिमालयनले पनि सर्वाधिक धेरै बाणिज्य बैंकको मुद्दती निक्षेपमा ६ अर्ब ९१ करोड रुपैयाँ लगानी गरेको छ । हिमालयन रिले बाणिज्य बेंकको मुद्दती बाहेक विकास बैंकको मुद्दती निक्षेपमा २० करोड रुपैयाँ लगानी गरेको छ । यस बाहेक हिमालयनले अन्य कुनै पनि क्षेत्रमा लगानी गरेको देखिदैन ।
नेपाल पुनर्बीमा कम्पनीले भने नेपाल सरकारको बचतपत्रमा ३० करोड रुपैयाँ लगानी गरेको छ । त्यस्तै सूचिकृत कम्पनीको साधारण शेयरमा ९ करोड ४७ लाख रुपैयाँ लगानी गरेको छ । यस बाहेक बैंकहरुको ऋणपत्र र अग्राधिकार शेयरमा एक अर्ब ६६ करोड रुपैयाँ लगानी गरेको छ ।
नेपाल पुनर्बीमाले म्युचुअल फण्डमा पनि ९ लाख ४४ हजार लगानी गरेको छ । त्यस्तै विभिन्न कम्पनीको संस्थापक शेयरमा एक अर्ब १० करोड रुपैयाँ लगानी गरेको छ । बीमा समितिले बीमा कम्पनीहरुलाई लगानीमा विविधता ल्याउन निर्देशन दिए पनि कम्पनीहरुले खासै अन्य क्षेत्रमा लगानी गर्न सकिरहेका छैनन् ।
पुनर्बीमा कम्पनी आफैमा जोखिमको व्यवसाय हो । यसले धेरै जोखिम लिने भएकाले आफ्नो लगानीलाई पनि त्यति धेरै जोखिमयुक्त क्षेत्रमा लगानी गरेको पाइदैन । भर्खरै सञ्चालनमा आएको हिमालयन रिको चुक्ता पूँजी नै ७ अर्ब रुपैयाँ मात्रै छ । यसले गर्दा पनि कम्पनीको लगानी त्यति धेरै ठुलो देखिदैन ।
