काठमाडौं । नारायणगढ–मुग्लिन सडकखण्डअन्तर्गत चितवनमा पहिरोले बगाएर पाँच दर्जन बढी यात्रुसहित दुई बस त्रिशूली नदीमा बेपत्ता भएको छ।
जिल्ला प्रहरी कार्यालय चितवनका अनुसार आज बिहान करिब साढे ३ बजे भरतपुर महानगरपालिकाको सिमलताल भन्ने स्थानमा पहिरोले बगाएको दुईवटा बस त्रिशूली नदीमा खसेको थियो। वीरगन्जबाट काठमाडौं आउँदै गरेको एन्जल डिलक्सको बस र काठमाडौंबाट गौर जाँदै गरेको गणपति डिलक्सको बस त्रिशूली नदीमा बेपत्ता भएको जिल्ला प्रहरी कार्यालयका प्रवक्ता डीएसपी भेषराज रिजालले जानकारी दिए। ‘ती बसमा सवार ३ यात्रु हाम फालेर र पौडेर बाहिर निस्केका छन्’, उनले भने, ‘उनीहरु सकुशल छन्।’
चितवनका प्रमुख जिल्ला अधिकारी इन्द्रदेव यादवले ती दुवै बसमा गरी करिब ६०–६५ जना यात्रु रहेको प्रारम्भिक अनुमान गरिएको बताए। ‘हामी अहिले घटनास्थलमै छौँ, उद्धार कार्य जारी छ’, उनले भने।
घटनास्थलमा अहिले सुरक्षाकर्मी र स्थानीय उद्धारमा खटिएका छन्। ठूलो पहिरो खसेकोले पानी परिरहेका कारण उद्धार कार्यमा केही समस्या भइरहेको पनि प्रहरीले जनाएको छ।
