काठमाडौं । त्रिभुवन अन्तर्राष्ट्रिय विमानस्थल भन्सार कार्यालयले १४ किलोग्राम सुनसहित गोरखाका चन्द्र घले सहित दुईजनालाई नियन्त्रणमा लिएको छ। फ्लाई दुबईको जहाजबाट बिहीबार राति काठमाडौंमा अवतरण गरेका घलेलाई विमानस्थलबाट भन्सारका अधिकारीहरूले सुनसहित पक्राउ गरेका हुन् ।
घलेले सुनको प्लेट बनाएर शरीरमा कपडाभित्र लुकाएर ल्याएका थिए । उनी बुधबार नै फ्लाई दुबईको फ्लाइटबाट नेपाल आउन लागेको पूर्वसूचना पाएपछि भन्सारका अधिकारीले विमानस्थलमा निगरानी बढाएकोमा उनी बुधबार उडेनन् । घले बुधबार नआएपछि बिहीबारको दुबईबाट आउने उडानहरुमा पनि भन्सार अधिकारीहरुले निरन्तर निगरानी गरेका थिए । फ्लाई दुबईको जहाज नम्बर एफजे ५७३ बाट ओर्लिएका घलेलाई भन्सार कर्मचारीले राती ११ः४० मा नियन्त्रणमा लिएका थिए।
घलेले सोधपुछका क्रममा आफूले बोकेको सुन मिन बहादुर घले नामका अर्को व्यक्तिको भएको बयान दिएपछि प्रहरीको सहयोगमा धुम्बाराहीबाट मीन बहादुर घलेलाई समेत नियन्त्रणमा लिएको थियो ।
बरामद भएको सुन शुक्रबार ताैलिएर त्यसको गुणस्तर समेत परिक्षण गरिने भन्सार विभागले जनाएको छ ।
