काठमाडौं । नेपाल विद्युत प्राधिकरणले ट्रंक र डेडिकेटेड लाइनको बक्यौता नबुझाउने तीन उद्योगको लाइन काटिदिएको छ। प्राधिकरणले मंगलबार रातिदेखि रिलायन्स स्पिनिङ मिल्स, घोराही सिमेन्ट र अर्घाखाँची सिमेन्टको लाइनट काटिदिएको हो।
लामो समयदेखि प्राधिकरण र उद्योगीबीच ट्रंक र डेडिकेटेड लाइनको बक्यौता महसुलका विषयमा विवाद हुँदै आएको थियो। पछिल्लो समय उद्योगको लाइन प्राधिकरणले काटिदिएपछि सरकार र उद्योगबीच विवाद चर्किएको थियो। समस्या समाधानका लागि सरकारले महसुल विवाद समाधान गर्न आयोग बनाएको थियो।
त्यसपछि प्राधिकरणले आयोगको सिफारिस र मन्त्रिपरिषदको निर्णयबमोजिम बक्यौता चुक्ताका लागि किस्ताबन्दीको कार्यतालिका बुझाउन उद्योगहरुलाई मंगलबारसम्म समय दिएको थियो। तर, अधिकांश उद्योगीले प्राधिकरणसमक्ष कार्यतालिका बुझाएका छैनन्। उनीहरुले बक्यौता रकम नतिर्ने अडानमा रहेका छन्।
कार्यतालिका बुझाउने समयसीमा सकिएसँगै प्राधिकरणले ती ३ उद्योगको लाइन काटिदिएको हो। आयोगकै प्रतिवेदनको सिफारिसका आधारमा तोकिएको समयसीमा बक्यौता रकम तिर्ने कार्यतालिका पेस नगरेको ती उद्योगको लाइन काट्नु परेको प्राधिकरणले जनाएको छ।
