काठमाडौं । शेयर बजारमा आज उछाल आउँदा लगानीकर्ताको सम्पत्ति पनि डेढ खर्ब रुपैयाँले बढेको छ।
साताको पहिलो कारोबार दिन आइतबार शेयर बजारमा हरियाली छाएको छ। बजार परिसूचक ९४.५३ अंकले बढ्दा २८६०.९१ को विन्दुमा बन्द भएको छ।
भारी अंकले बढेको बजारमा आज दैनिक कारोबार रकमले नयाँ रेकर्ड कायम गरेको छ। आज २५ अर्ब ७७ करोड ९४ लाख रुपैयाँ बढीको कारोबार भएको छ। जुन नेपाली शेयर बजारको इतिहासमै उच्च हो।
बजारको दह्रो बढोत्तरीसँगै नेप्सेको कुल बजार पुँजीकरण बढेर ४५ खर्ब ४१ अर्ब ३ करोड ३२ लाख रुपैयाँ पुगेको छ। गत बिहीबार बजार बन्द हुँदा कुल बजार पुँजीकरण ४३ खर्ब ९१ अर्ब ९ करोड ३२ लाख रुपैयाँ थियो। यो हिसाबले लगानीकर्ताको सम्पत्ति आज एकैदिन १ खर्ब ४९ अर्ब ९४ करोड रुपैयाँले बढेको छ।
