काठमाडौं । घोराही सिमेन्ट इण्डष्ट्री लिमिटेडको आइपीओमा ६ लाख बढीको आवेदन परेको छ । सिडिएसका अनुसार आज अन्तिम दिन असार २५ गते साँझ ५ः०६ बजेसम्म ६ लाख ७३ हजार ८३९ जनाले ११ अर्ब ५ करोड ७८ लाख ३९ हजार २०० रुपैयाँको २ करोड ५४ लाख २० हजार ३२० कित्ताका लागि आवेदन परेको हो ।
कम्पनीले असार २२ गतेदेखि उक्त आइपीओ पुनः निष्काशन सुचारु गरेको थियो । कम्पनीले प्रतिशेयर १०० रुपैयाँ अंकित मूल्यमा ३३५ रुपैयाँ प्रिमियम थप गरी प्रतिकित्ता ४३५ रुपैयाँका दरले ६९ लाख ११ हजार ६७० कित्ता शेयर निष्काशन गरेको हो।
आइपीओ निष्काशनको लागि गराएको रेटिङ्गमा केयर रेटिङ्ग नेपालले कम्पनीलाई केयरएनपी ट्रिपल बी माइनस इस्यूअर रेटिङ्ग प्रदान गरेको छ। यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ।
कम्पनीको शेयर निष्काशन तथा बिक्री प्रबन्धक हिमालयन क्यापिटल लिमिटेड र नबिल इन्भेष्टमेन्ट बैंकिङ्ग लिमिटेड रहेको छ। आयोजनाको साधारण लगानी फिर्ता हुने अवधि ४ वर्ष ८ महिना रहेको छ भने डिस्काउण्टमा लगानी फिर्ता हुने अवधि ८ वर्ष ५ महिना रहेको छ।
