काठमाडौं । अरुण भ्याली हाइड्रोपावर डेभलपमेन्ट कम्पनीले आउँदो फागुन १७ गतेदेखि १०० प्रतिशत हकप्रद शेयर बिक्री खुला गर्ने भएको छ।
कम्पनीले हाल कायम चुक्तापुँजी १ अर्ब ८६ करोड ७९ लाख ६२ हजार ६०० रुपैयाँको १०० प्रतिशत हकप्रद बिक्री खुला गर्ने भएको हो। कम्पनीले १०० रुपैयाँ अंकित दरका १ करोड ८६ लाख ७९ हजार ६२६ कित्ता हकप्रद निष्कासन गर्नेछ।
अरुण भ्याली हाइड्रोपावरको हकप्रद शेयरमा आउँदो चैत ७ गतेसम्म आवेदन दिन सकिनेछ। लगानीकर्ताले धितोपत्र बिक्री प्रबन्धक मुक्तिनाथ क्यापिटलको कार्यालयका साथै कम्पनीको केन्द्रीय कार्यालय, मुक्तिनाथ विकास बैंक र ग्लोबल आइएमई बैंकका तोकिएका शाखा कार्यालयहरुबाट आवेदन दिन सक्नेछन्। नेपाल धितोपत्र बोर्डबाट अनुमति लिई सी–आस्वा सेवामा सहभागी बैंक तथा वित्तीय संस्थाहरुबाट र सीडीएससीको ‘मेरो शेयर’ पनि खरिद आवेदन दिन सक्नेछन्।
यो हकप्रद शेयर निष्कासन प्रयोजनार्थ कम्पनीले माघ १५ गते बुक क्लोज गरेको थियो। यसको अर्थ माघ १४ गतेसम्म कायम शेयरधनीहरुले मात्रै यो कम्पनीको हकप्रदमा खरिद आवेदन दिन पाउनेछन्।
हकप्रद बिक्रीपछि कम्पनीको चुक्तापुँजी ३ अर्ब ७३ करोड ५९ लाख २५ हजार २०० रुपैयाँ पुग्नेछ।
