काठमाडौं । सरकारले स्वास्थ्य बीमा बोर्डमा रिक्त रहेको कार्यकारी निर्देशक पदमा नियुक्तिको प्रक्रिया अगाडि बढाएको छ।
बीमा बोर्डमा ३ महिनादेखि कार्यकारी निर्देशक पद रिक्त रहेको छ। डा दामोदर बसौलाको कार्यकारी निर्देशकको कार्यकाल गत कात्तिक २५ गतेबाट पूरा भएको थियो।
स्वास्थ्य तथा जनसंख्या मन्त्रालयद्वारा गठित सिफारिस मितिले आज एक सूचना जारी गर्दै बीमा बोर्डमा कार्यकारी निर्देशक पदमा दरखास्त आह्वान गरेको हो। खुला प्रतिस्पर्धाबाट कार्यकारी निर्देशकको नियुक्ति प्रक्रिया अगाडि बढाइएको समितिले जनाएको छ।
इच्छुक उम्मेदवारले सूचना प्रकाशित भएको मितिले १० दिनभित्र स्वास्थ्य मन्त्रालयमा आवश्यक कागजातसहित दरखास्त पेस गर्न सक्नेछन्। दरखास्त पेस गर्दा उम्मेदवारले आवश्यक शैक्षिक योग्यताको प्रमाणपत्रको प्रतिलिपि, नागरिकताको प्रमाणपत्रको प्रतिलिपिका साथै अवधारणापत्रसहितको कार्ययोजना पेस गर्नुपर्नेछ।
उम्मेदवारको उमेर ६५ वर्ष ननाघेको हुनुपर्नेछ। दरखास्त दस्तुर ५ हजार रुपैयाँ लाग्नेछ। दरखास्त फाराम मन्त्रालयको वेबसाइटबाट डाउनलोड गर्न सकिनेछ।
सिफारिस समितिले परेको दरखास्तमध्येबाट ५ जनाको नाम सर्टलिस्ट गरेर अन्तर्वार्ता तथा कार्ययोजना प्रस्तुतीकरणका लागि डाक्नेछ। त्यसमा उच्च अंक प्राप्त गर्ने कम्तीमा ३ जनाको नाफामा छनौट गरी मन्त्रिपरिषदसमक्ष सिफारिस गर्नेछ। मन्त्रिपरिषद ती उम्मेदवारमध्ये एकजनालाई बीमा बोर्डको कार्यकारी निर्देशकमा नियुक्त गर्नेछ।
