काठमाडौं । भारतीय बीमा नियामकले बीमित शिक्षा र संरक्षणका लागि ८ अर्ब भारतीय रुपैयाँबराबरको बीमित सचेतना तथा संरक्षण कोष सञ्चालनमा ल्याउने भएको छ।
बीमा नियामक तथा विकास प्राधिकरणले ‘सबका बीमा सबकी रक्षा’ योजनाअन्तर्गत यस्तो कोष स्थापना र सञ्चालन गर्ने तयारी गरेको हो । बीमा ऐनको प्रावधानले बीमित जागरण, बीमित हित संरक्षण र बीमित लक्षित अन्य पहलका लागि कोष स्थापनाको व्यवस्था गरेको छ।
यो कोषमा केन्द्र सरकारबाट प्राप्त अनुदान तथा दान, प्राधिकरण र अन्य स्रोतबाट प्राप्त रकम, बीमकमाथि गरिएको जरिवानाबापतको रकम र नियामकले तोकेको अन्य रकम यो कोषमा जम्मा गरिनेछ । प्राधिकरणले यस्तो कोषमा जम्मा भएको रकम बीमित सचेना, संरक्षण र सम्बन्धित प्रयोजनमा ल्याउनेछ।
प्रस्तावित कोष परिचालन कार्यविधिले बीमा जागरण, बीमित हित संरक्षण सुदृढीकरण, गुनासो सुनुवाइ प्रणालीको सबलता र बीमितलाई अझ सुदृढ सेवाका लागि प्रविधिको प्रयोगमा जोड दिन संरचनागत र स्थायी रुपरेखा तयार गर्नेछ।
कोषबाट प्राप्त हुने ब्याज तथा प्रतिफलबापतको आम्दानीलाई देशव्यापी बीमा शिक्षा र जागरण, महाविपदका बेला पूर्वसूचना वितरण गर्न र दाबी नगरिएको रकम पत्ता लगाउने प्रणालीको विकासमा प्रयोग गरिनेछ।
प्राधिकरणले कोषको सञ्चालन तथा व्यवस्थापनका लागि कोष व्यवस्थापन समितिको समेत प्रस्ताव गरेको छ।
