काठमाडौं । विश्वव्यापी बीमा कम्पनीहरु आर्थिक रुपमा स्थिर रहेका छन्। तर, भूराजनीतिक तनाव, आर्थिक दबाब र साइबर जोखिमहरु बीमा क्षेत्रका लागि प्रमुख चिन्ताको विषय बन्दै गइरहेका छन्।
इन्टरनेसनल एसोसिएसन अफ इन्स्योरेन्स सुपरभाइजर (आईएआईएस)को सन् २०२६ को ग्लोबल मोनिटरिङ एक्सरसाइजका प्रारम्भिक नतिजाहरुले सन् २०२५ को अन्त्यमा बीमा कम्पनीहरुको स्थायित्व र नाफा स्थिर रहेको संकेत गरेको छ। जसलाई सञ्चालन कार्यसम्पादन, सम्पत्ति दायित्व व्यवस्थापन र बलियो पुँजी बफरहरुले समर्थन गरेका छन्।
यद्यपि, आईएआईएसले बीमा कम्पनीहरुले कम तरल सम्पत्तिमा बढेको लगानी, शेयर पुनःप्राप्ति, ऋण चुक्ता, लाभांश भुक्तानी र बजार अस्थिरताजस्ता चुनौतीहरुको सामना गरिरहेको उल्लेख गरेको छ। विश्वव्यापी बीमा समूहहरुका लागि समग्र प्रणालीगत जोखिम स्कोर पनि एक वर्षअघिको तुलनामा न् २०२५ को अन्त्यमा थोरै बढेको छ। यो वृद्धि मुख्यतया सम्पत्ति बिक्रीका कारणले गर्दा अतिरिक्त नगद जुटाउन र बीमा कम्पनीहरु, वित्तीय बजारहरु र व्यापक अर्थतन्त्रबीचको अन्तरसम्बन्धमा वृद्धि भएको हो।
सन् २०२६ को अनुगमन अभ्यासमा आईएआईएसले गहन विश्लेषणका लागि तीन क्षेत्र जीवन बीमा कम्पनीहरुको ब्यालेन्स सिटमा समष्टिगत आर्थिक जोखिमको प्रभाव, निर्जीवन बीमामार्फत भूराजनीतिक जोखिम कसरी प्रसारित हुन्छ र बीमा कम्पनीहरुको साइबर लचिलोपनमा कृत्रिम बुद्धिमत्ता (एआई) र अन्य प्रविधिको प्रभाव पहिचान गरेको छ।
जीवन बीमा कम्पनीहरुका लागि ब्याजदर, क्रेडिट स्प्रेड र मुद्रास्फीतिमा परिवर्तनले सोल्भेन्सी, तरलता र नाफामा दबाब दिन सक्छ। किनकि तिनीहरुसँग दीर्घकालीन दायित्वहरु रहेका हुन्छन्। बीमा कम्पनीहरुले सम्पत्ति पुनर्वितरण, परिदृश्य विश्लेषण, र तरलता तनाव परीक्षणजस्ता उपायमार्फत यसलाई सम्बोधन गरिरहेका छन्।
निर्जीवन बीमामा भूराजनीतिक द्वन्द्वले ऊर्जा बजारलाई बाधा पुर्याउन सक्छ, दाबी लागत बढाउन सक्छ र अन्डरराइटिङ जोखिम बढाउन सक्छ। आईएआईएसले भन्यो, ‘बीमा कम्पनीहरुले यी जोखिम व्यवस्थापन गर्न पुँजी र तरलता बफरहरुलाई बलियो बनाइरहेका छन्। बीमा कम्पनीहरु र अन्य व्यवसायहरुले नयाँ एआई मोडेलहरु अपनाउँदा साइबर जोखिम पनि जटिल हुँदै गइरहेको छ।’
आईएआईएसले एआई र प्रविधिमा भएको प्रगतिले बीमा कम्पनीहरुको सञ्चालन लचिलोपनलाई कसरी असर गर्न सक्छ भनेर जाँच गरिरहेको छ। आईएआईएसको सन् २०२६ को अनुगमन अभ्यासमा १८ क्षेत्रमा ५६ वटा ठूला अन्तर्राष्ट्रिय बीमा समूह समावेश छन्। यसका साथै विश्वव्यापी कुल प्रिमियमको ९० प्रतिशतभन्दा बढी प्रतिनिधित्व गर्ने समग्र बजार डाटा पनि समावेश छ।
आईएआईएसको पूर्णवर्षीय विश्वव्यापी बीमा बजार प्रतिवेदन डिसेम्बरमा आउनेछ। – एजेन्सी
