काठमाडौं । फिनल्यान्ड फेरि विश्वकै खुसी देश बन्न सफल भएको छ। हरेक वर्ष सार्वजनिक हुने वर्ल्ड ह्याप्पिनेस रिपोर्टमा फिनल्यान्ड फेरि विश्वकै खुसी देश बन्न सफल भएको हो। फिनल्यान्ड लगातार ८ वर्षदेखि विश्वकै खुसी बन्न सफल भएको छ।
विश्वस्तरमा खुसीको स्तर निर्धारण गर्न धेरै कुरालाई ध्यानमा राखिन्छ। जसमा जनताको स्वतन्त्रता, स्वास्थ्य, भ्रष्टाचार, आम्दानी आदि पर्दछन् । यो प्रतिवेदन तयार गर्दा सामाजिक सुरक्षा, स्वास्थ्य, आय, स्वतन्त्रता, जनतामा उदारताको भावना र भ्रष्टाचार नहुने गरी मुख्यतया ६ कुरालाई ध्यानमा राखिएको छ । मानिसलाई खुसी बनाउन यी सबै कुरा आवश्यक हुन्छ । यी सबै कुरा पूरा गर्ने र धेरै अंक ल्याउने देशलाई खुसी र कम अंक ल्याउने देशलाई सबैभन्दा दुःखी देश मानिन्छ।
विश्वकै दोस्रो खुसी देश डेनमार्क बन्न सफल भएको छ। डेनमार्कपछि शीर्ष १० भित्र आइसल्यान्ड, स्विडेन, नेदरल्यान्ड्स, कोस्टारिका, नरवे, इजरायल, लग्जम्बर्ग र मेक्सिको रहेका छन्।
वर्ल्ड ह्याप्पिनेस रिपोर्टमा १४७ वटा मुलुकलाई समेटिएको छ। यो सूचीमा नेपाल ९२ औँ स्थानमा रहेको छ। नेपालपछि पाकिस्तान १०९ औँ स्थानमा, भारत ११८ औँ स्थानमा र श्रीलंका १३३ औँ स्थानमा छन्।
छिमेकी मुलुक चीन ६८ औँ स्थानमा रहँदा विश्वकै ठूलो अर्थतन्त्र अमेरिका २४ औँ स्थानमा रहेको छ।
