काठमाडौं । सामुदायिक लघुवित्त वित्तीय संस्थाले ३६.२६ प्रतिशत लाभांश दिने प्रस्ताव गरेको छ । मंगलबार बसेको कम्पनीको सञ्चालक समिति बैठकले आर्थिक वर्ष २०७५।७६ को नाफाबाट ३४.४५ प्रतिशत बोनस र यसमा लाग्ने कर तिर्न १.८१ प्रतिशत नगद लाभांश दिने भएको छ ।
यसर्थ, कम्पनीले ३ करोड ४४ लाख ५० हजार रुपैयाँ बराबरको बोनस वितरण गर्नेछ । कर तिर्न भने १८ लाख १० हजार रुपैयाँ नगद लाभांश बाँड्नेछ । यस्तै, कम्पनीको सोही बैठकले बोनस सेयरपछि कायम हुने चुक्ता पुँजीबाट ५० प्रतिशत हकप्रद ल्याउने निर्णय पनि गरेको छ ।
हाल लघुवित्तको चुक्ता पुँजी १० करोड रुपैयाँ रहेको छ । बोनस वितरणपछि चुक्ता पुँजी १३ करोड ४४ लाख ५० हजार रुपैयाँ पुग्नेछ । लघुवित्तले यही पुँजीबाट ५० प्रतिशत हकप्रद ल्याउन लागेको हो । हकप्रदपछि पुँजी २० करोड १६ लाख ७५ हजार रुपैयाँ पुग्नेछ ।
कम्पनीको प्रतिसेयर आम्दानी २४ रुपैयाँ ४४ पैसा र प्रतिसेयर नेटवर्थ १५५ रुपैयाँ ४४ पैसा रहेको छ ।
