राष्ट्रिय वाणिज्य बैंक कर्मचारी संघ नेपालले रक्तदान, वृद्धवृद्धालाई सहयोग एवम् खेल आयोजना गरेको छ । उक्त सघले आफ्नो ३० औं वार्षिकोत्सवको अवसरमा विभिन्न कार्यक्रमको आयोजना गरी मनाएको हो ।
बैंकका प्रमुख कार्यकारी अधिकृत किरणकुमार श्रेष्ठले संघका बरिष्ठ उपाध्यक्ष रामप्रसाद जोशीलाई ब्लड ब्याग हस्तान्तरण गरेर सुरु गरिएको रक्तदान कार्यक्रममा ८३ जना बैंक कर्मचारीहरुले रक्तदान गरेका थिए ।
यसै अवसरमा निसहाय सेवा सदन, बानेश्वरमा बृद्धबृद्धालाई भोजन खुवाइएको थियो भने रावा बैंकको केन्द्रीय कार्यालय सिंहदरबारप्लाजा परिसरमा वृक्षारोपण पनि गरिएको थियो । त्यस्तै, बैंक कर्मचारीहरु बीच म्युजिकल चेयर खेल प्रतियोगिता समेत संचालन गरिएको थियो ।
जोरपाटीस्थित बुद्धिष्ट बालगृहलाई रु १० हजार बराबरको शैक्षिक सामग्री प्रदान गरिनुका साथै २०७५ सालको माध्यामिक शिक्षा परीक्षामा उत्कृष्ट जीपिए प्राप्त गर्ने कर्मचारी संघमा आवद्ध बैंक कर्मचारीहरुका ५ जना छोरा छोरीहरुलाई राविया छात्रवृत्ति पुरस्कार पनि प्रदान गरिएको बैंकले जनाएको छ ।
वार्षिकोत्सवको अवसर पारेर कर्मचारी संघमा आवद्ध निवृत ४८ जना बैंक कर्मचारीहरुलाई संघको आजिवन सदस्य पदक पनि प्रदान गरिएको छ ।
कार्यक्रमका प्रमुख अतिथि कानून, न्याय तथा संसदीय मामिला मन्त्री एवं नेकपाका केन्द्रीय सदस्य भानुभक्त ढकालले कर्मचारीहरुको भावनालाई सङकुचित नहुने गरी कानून बनाइने र सरकारले ट्रेड यूनियनको माथि कुनै किसिमको प्रतिबन्ध नलगाउने बताए ।
कार्यक्रमका अध्यक्ष एवम् राष्ट्रिय वाणिज्य बैंक कर्मचारी संघ नेपालका अध्यक्ष हेमराज सुवेदीले संस्थाको सम्बद्र्धन र पेसागत हकहित नै कर्मचारी संघको मूख्य उद्देश्य रहेको बताए ।
