एसियन लाइफ इन्स्योरेन्स कम्पनीकोे असार १ गतेदेखि लिलामीमा आएको २ लाख २१ हजार ३५९.७३ कित्ता लिलामी शेयर भर्ने आइतबार अन्तिम दिन रहेको छ । कम्पनीले संस्थापकतर्फको २ हजार ४ सय २० दशमलव ७० कित्ता र सर्वसाधारणतर्फको २ लाख १८ हजार ९ सय ३९ दशमलव शून्य ३ कित्ता शेयर लिलामीमा ल्याएको हो ।
इनस्योरेन्सले चैत २५ देखि वैशाख २९ गतेसम्म ६० प्रतिशत हकप्रद निष्काशन गर्दा बिक्री नभएको शेयर लिलामी गर्न लागेको हो । बजारमा ३८८ रुपैयाँ शेयर मूल्य कायम रहेको कम्पनीको बोलकबोल गर्दा शेयरको न्यूनतम मूल्य प्रतिशेयर सय रुपैयाँ तोकिएको हुँदा सो वा सो भन्दा बढी मूल्य अंकित गरी गर्नुपर्नेछ ।
स्थापक समूहमा न्यूनतम १ हजार कित्ता र सर्वसाधारण समूहमा न्यूनतम १०० कित्तादेखि अधिकतम सबै कित्ताका लागि आवेदन दिन सकिन्छ । बिक्री प्रबन्धक एनआइबीएल एस क्यापिटल लाजिम्पाट काठमाडौं र यसका लगनखेल, पोखरा, बुटवल, वीरगञ्ज र विराटनगर शाखाबाट लिलामी भर्न सकिनेछ ।
त्यस्तै, नेपाल इन्भेष्टमेन्ट बैंकका नारायणगढ, हेटौंडा, बिर्तामोड, जनकपुर, तुल्सीपुर, सुर्खेत, नेपालगञ्ज र धनगढी शाखाबाट पनि लिलामीमा आवेदन दिन पाउने व्यवस्था रहेको छ । ग्रीन डेभलपमेन्ट बैंकको, हरिशंकर रोड बागलुङबाट पनि बोलपत्र फारम भर्न पाइनेछ ।
