काठमाडौं । टर्कीमा भइरहेको संयुक्त राष्ट्रसंघीय जलवायु परिवर्तनसम्बन्धी महासन्धिका पक्ष राष्ट्रहरुको ३१औँ सम्मेलन (सीओपी३१) मा करिब एक दर्जन कार्यक्रमहरुमा सहभागी भई अर्थमन्त्री डा स्वर्णिम वाग्ले आज स्वदेश फर्किएका छन्।
अर्थमन्त्री वाग्लेले ४४ वटा अतिकम विकसित राष्ट्रका तर्फबाट जलवायु वित्त सम्बन्धि सातौँ द्विवार्षिक मन्त्रीस्तरीय संवादलाई सम्बोधन गरे। त्यस्तै ७ वर्षअघि स्थापित ‘जलवायु मुद्दाका लागि अर्थमन्त्रीहरुको गठवन्धन’मा नेपाललाई १०५ औँ (नयाँ) सदस्यका रुपमा सामेल गराउँदै ‘उत्थानशीलताका लागि वित्त’बारे नीतिगत अवधारणा छलफलका लागि पेस गरे।
विपद्पछि ऋणमोचनको विश्वव्यापी अभियान चलाएकी बार्बेडसकी प्रधानमन्त्री मिया मोट्ली र विश्व अर्थतन्त्रको ८५ प्रतिशत हिस्सा ओगट्ने जी–२० समूहको अध्यक्षता गर्न लागेको बेलायतका विदेशमन्त्री एड मिलीब्यान्डसँग विशेष अन्तर्राष्ट्रिय प्याकेजमा सहकार्य गर्ने प्रतिवद्धता प्राप्त भएको छ।
त्यस्तै सीओपी३१ मा नेपालले उठाएका विषयमा सहयोग लिने हेतुले अर्थमन्त्री वाग्लेसँग पाँचजना प्रभावशाली जलवायु दूतहरुको छलफल भयोः बेलायतकी रेचेल काइट, अष्ट्रेलियाका विल नानकर्भिस, स्वीडेनका माटियास फ्रुमेरी, जमाइकाका डेल वेबर र राष्ट्र संघीय महासचिवका दुत सेल्विन हार्ट। हरित जलवायु कोषको उच्च नेतृत्वसँग भावी कार्यक्रमका बारेमा अर्थमन्त्रीले छलफल गर्नुभएको छ भने जेनेभास्थित विश्व मौसम–विज्ञान संगठनको नेपालले समेत लाभ लिएको जलवायु मापन कोष सम्बन्धि कार्यक्रमलाई विशेष सम्वोधन गर्नुभएको छ।
जलवायु र अर्थशास्त्रमा ख्याति कमाएका प्रा योहान रक्स्त्रम र प्रा निकलस स्टर्नसँग समेत अर्थमन्त्री वाग्लेले भेटघाट गरे। उनले न्युयोर्क टाइम्सलाई एउटा अन्तर्वार्ता दिए भने सन् २०२६ का लागि टाइम पत्रिकाले रोजेका जलवायु मुद्दामा अर्थमन्त्री लगायत विश्वकै १०० प्रभावशाली व्यक्तित्वहरुको सम्मानमा आयोजित एक कार्यक्रममा पनि उनी सरिक भए।
