काठमाडौं । साउदी अरबको राजधानी रियादमा रहेको किङ खालिद अन्तर्राष्ट्रिय विमानस्थलमा भएको आक्रमणमा १२ जनाको मृत्यु भएको छ भने ३०९ जना घाइते भएका छन्।
स्थानीय अधिकारीहरुका अनुसार घाइतेहरुमध्ये केहीको अवस्था गम्भीर छ। आक्रमणपछि विमानस्थल सञ्चालन स्थगित गरिएको छ। उड्डयन ट्रयाकिङ वेबसाइट फ्लाइटराडारका अनुसार रियाद जाने सबै उडानहरु डाइभर्ट वा रद्द गरिएको छ।
साउदी नागरिक उड्डयन प्राधिकरणका अनुसार मृतकहरुमा चार साउदी नागरिक, दुई बंगलादेशी नागरिक र संयुक्त राज्य अमेरिका, जोर्डन, प्यालेस्टाइन, सिरिया, सुडान र इजिप्टका एक–एक नागरिक समावेश छन्। अधिकारीहरुले विमानस्थलमा भएको क्षतिको मूल्यांकन भइरहेको बताएका छन्।
साउदी नेतृत्वको सैन्य गठबन्धनले आक्रमणका लागि यमनका हुथी विद्रोहीहरुलाई दोष दिएको छ। गठबन्धनले आक्रमणलाई ‘युद्ध अपराध’ घोषणा गरेको छ र बदलाको चेतावनी दिएको छ।
गठबन्धनका प्रवक्ता मेजर जनरल टर्की अल–मलिकीले विमानस्थलको यात्रु टर्मिनलमा भएको आक्रमणमा सर्वसाधारण यात्रु र विमानस्थलका कर्मचारीहरु मारिएको र धेरैजना घाइते भएको बताए। उनले आक्रमणलाई गम्भीर युद्ध अपराधको रुपमा वर्णन गरे। –एजेन्सी
