काठमाडौं । मध्यपूर्व तनाव, होर्मुज समुद्रीमार्ग बन्द हुनु र बाब–एल–मन्डेबलगायत अन्य तेल मार्गको अवरोधले विश्वमा प्रभाव पारिरहेको छ। अहिले एउटा युरोपेली मुलुकले इन्धनको गम्भीर संकटको सामना गरिरहेको छ।
फ्रान्समा तेल संकट चरम सीमामा पुगेको छ। फ्रान्सका नौमध्ये एउटा पेट्रोल पम्पमा पेट्रोल र डिजेल सकिएको छ।
तेल आपूर्तिको निरन्तर अभावका कारण फ्रान्समा इन्धन संकटले जनतालाई नराम्रो असर पारिरहेको छ। आपूर्तिको अभावले पेट्रोल पम्पहरुमा तेलको मूल्यमा तीव्र वृद्धि भएको छ। विशेषगरी डिजेलको औसत मूल्य प्रतिलिटर २.३९ युरो नाघेको छ। जसले अघिल्ला सबै राष्ट्रिय मूल्य रेकर्ड तोडेको छ।
फ्रान्सरका ७०० भन्दा बढी पेट्रोल पम्पमा उच्च–ग्रेड डिजेल प्रतिलिटर २.५० युरोभन्दा बढीमा बिक्री भइरहेको छ। जब कि धेरै इन्धन स्टेसनमा यो प्रतिलिटर २.७० युरोसम्ममा बिक्री भइरहेको छ।
फ्रान्समा इन्धन संकट पहिले कहिल्यै नदेखिएको स्तरमा गहिरिँदै गइरहेको छ। डिजेलको मूल्य रेकर्ड उच्च पुगेको छ। तर पछिल्लो सरकारी तथ्यांकले देखाउँछ कि देशभरका लगभग ११ प्रतिशत पेट्रोल पम्प स्टेसन वा लगभग नौमध्ये एक कम्तीमा एक प्रकारको पेट्रोल वा डिजेलको स्टक कायम राख्न संघर्ष गरिरहेका छन्।
पेट्रोल–डिजेलको मूल्य वृद्धि र इन्धन आपूर्तिमा निरन्तर अवरोधका कारण पेट्रोल पम्पहरुमा मोटर चालकको ठूलो भीड लागेको छ र स्थिति बिग्रँदै गएको देखिन्छ। क्षेत्रीय रुपमा ग्रान्ड एस्टका १६ प्रतिशत इन्धन स्टेसनले अभाव अनुभव गरिरहेका छन्। त्यसपछि सेन्टर–भ्याल–डे–लोइर र ओसिटानीमा १४ प्रतिशत र पेस–डे–ला–लोइरमा १३ प्रतिशतको अभाव देखिएको छ।
साउदी अरेबियाको तेल आपूर्ति प्रतिबन्धले युरोपेली आपूर्तिमा थप दबाब बढाएको छ। अवस्था यति बिग्रिएको छ कि फ्रान्सेली राष्ट्रपति इमानुएल म्याक्रोनले आपतकालीन भण्डार जारी गर्न जी–७ लाई अपिल गरेका छन्। बढ्दो आपूर्ति अवरोधलाई ध्यानमा राख्दै म्याक्रोनले जी–७ नेताहरुको बैठक बोलाउने योजना घोषणा गरेका छन्। –एजेन्सी
