काठमाडौं । अमेरिकाले भारत, चीन, रुस र इरानमा फैलिएको बहुराष्ट्रिय नेटवर्कमा नयाँ प्रतिबन्ध लगाएको छ।उनीहरुमाथि इरानको महान एयर र इस्लामिक रिभोलुसनरी गार्ड कोप्र्स (आईआरजीसी)लाई विद्यमान प्रतिबन्धहरुबाट बच्न मद्दत गरेको आरोप छ।
अमेरिकी ट्रेजरी विभागको विदेशी सम्पत्ति नियन्त्रण कार्यालय (ओएफएसी)द्वारा घोषणा गरिएको प्रतिबन्धहरुले प्रतिबन्धित इरानी एयरलाइन्सलाई रसद, व्यावसायिक र वित्तीय सहयोग प्रदान गरेको आरोप लागेका ६ संस्था र व्यक्तिलाई लक्षित गर्दछ। खबरहरुअनुसार भारतको स्किज ट्राभल्स एन्ड लजिस्टिकलाई महान एयरका लागि व्यावसायिक र ग्राहक समर्थन साझेदारका रुपमा काम गर्नबाट रोक लगाइएको छ।
अमेरिकी कारबाहीमा भारत, चीन, रुस र इरानका कम्पनीहरु समावेश छन्। चीनको सांघाई विंग्स इन्टरनेसनल लजिस्टिक र सांघाई एलिट इन्टरनेसनल ट्राभल, रुसको एयर कार्लो प्रो र भारतको स्किज ट्राभल्सलाई लक्षित गरिएको छ।
अमेरिकी अधिकारीहरुले लामो समयदेखि महान एयरलाई आईआरजीसी–कुड्स फोर्सका लागि यातायात नेटवर्कका रुपमा काम गरेको आरोप लगाउँदै आएका छन्। उनीहरुले यसलाई हतियार, सेना र मानवरहित हवाई सवारीसाधन (यूएभी) ढुवानी गर्न प्रयोग गरिएको आरोप लगाएका छन्।
इरानले पहिले यस्ता आरोपलाई अस्वीकार गरेको छ। यो प्रतिबन्ध प्याकेजले ‘डड्नेगर स्टार्टअप स्टुडियो’ नामक इरानी फ्रन्ट कम्पनीलाई पनि लक्षित गर्दछ। जसलाई मध्यपूर्वमा रहेका अमेरिकी र इजरायली आधारहरुका बारेमा जानकारी संकलन गर्ने र सैन्य गतिविधिमा सहयोग गर्ने आरोप लगाइएको छ।
अमेरिकी कोषाध्यक्ष स्कट बेसान्टले एक विज्ञप्तिमा भनेका छन्, ‘आईआरजीसी वा महान एयरलाई वित्तीय सेवा, रसद, वा व्यावसायिक सहयोग प्रदान गर्नेहरुले आतंकवादी संगठनलाई टिकाउन मद्दत गरिरहेका छन्। तिनीहरुलाई अमेरिकी वित्तीय प्रणालीबाट पहिचान, पर्दाफास र अलग गर्न जारी राख्नेछ।’ –एजेन्सी
