काठमाडौं । कम्पनी रजिष्ट्रारको कार्यालयले सेवाग्राहीको सुविधाका लागि आर्टिफिसियल इन्टेलिजेन्समा आधारित कल सेन्टर सञ्चालनमा ल्याएको छ।
कार्यालयले बुधबार एक सूचना जारी गर्दै प्रविधिको प्रयोगमार्फत सेवाग्राहीलाई कार्यालयका सेवा र प्रक्रियाबारे द्रुत जानकारी दिन यो सेवा सुरु गरिएको जनाएको हो।
यो कल सेन्टर सेवा दिनको २४सै घण्टा र हप्ताको सातै दिन उपलब्ध रहनेछ। कल सेन्टरमार्फत कम्पनी प्रशासन, कार्यालयले प्रदान गर्ने सेवाहरू, सेवा प्राप्त गर्ने प्रक्रिया, आवश्यक कागजातहरू र कार्यालयका कर्मचारीहरूको ‘एक्स्टेन्सन’ नम्बर समेत प्राप्त गर्न सकिनेछ।कम्पनी दर्ता गर्नुअघि र दर्ता भइसकेपछिका विभिन्न प्रक्रियागत कार्यहरूमा यसले सेवाग्राहीलाई मार्गदर्शन गर्नेछ।
सेवाग्राहीले कम्पनी प्रशासनसँग सम्बन्धित आफ्ना जिज्ञासा वा समस्याका लागि ९७००००४४१४ मा फोन गरी जानकारी प्राप्त गर्न सक्नेछन्।
कार्यालयका अनुसार, यो प्रणालीलाई क्रमशः थप ‘डाटा’ र ज्ञानहरू समावेश गर्दै अझ परिष्कृत र प्रभावकारी बनाइँदै लगिनेछ। सरकारी सेवालाई प्रविधिमैत्री बनाउने र बिचौलियाको झन्झट बिना सेवाग्राहीले घरबाटै सूचना पाउने वातावरण निर्माण गर्न यो कदम चालिएको कार्यालयले जनाएको छ।
