काठमाडौं । भुजुङ हाइड्रोपावरको शेयर आउँदो आइतबारबाट कारोबारमा आउने भएको छ।
भुजुङ हाइड्रोपावरको आइपीओ आज नेपाल स्टक एक्सचेन्ज (नेप्से)मा सूचीकृत भएको छ। कुनै पनि कम्पनीको शेयर नेप्सेमा सूचीकृत भएको दोस्रो दिनबाट कारोबारमा आउँछ। तर, भोलि शुक्रबार (शेयर कारोबार) नहुने भएकोले यो कम्पनीको शेयर आउँदो आइतबारबाट कारोबारमा आउने भएको छ।
नेप्सेमा भुजुङ हाइड्रोपावरको १ करोड कित्ता साधारण शेयर सूचीकृत भएको छ। जसमा संस्थापको ८० लाख कित्ता (८० प्रतिशत) र सर्वसाधारणको २० लाख कित्ता (२० प्रतिशत) रहेको छ।
नेप्सेले यो कम्पनीलाई ‘बीजेएचएल’ कारोबार संकेत प्रदान गरेको छ भने पहिलो कारोबारका लागि प्रतिकित्ता न्यूनतम ९०.०४ रुपैयाँ र अधिकतम २७०.१२ रुपैयाँ तोकेको छ। अब आइतबार स्पेसल प्रिसेसनमा यदि यो कम्पनीको शेयर नेप्सेले तोकेको रेन्जभित्र किनबेच भएमा नियमित सत्रका लागि कारोबारमा आउनेछ।
भुजुङ हाइड्रोपावर गत माघ १२ गतेदेखि माघ १५ गतेसम्म सर्वसाधारणका लागि ८ लाख ३० हजार कित्ता आइपीओ बिक्री खुला गरेको थियो। यो आइपीओको बाँडफाँट धितोपत्र बिक्री प्रबन्धक कुमारी क्यापिटलमा माघ २७ गते गरिएको थियो।
