काठमाडौं । टाटा समूहको एयरलाइन्स एयर इन्डियाका विमानहरुमा थुप्रै सुरक्षा त्रुटिहरु पत्ता लागेको छ।
युरोपेली उड्डयन सुरक्षा एजेन्सी (ईएएसए)ले युरोपेली विमानस्थलहरुमा एयर इन्डियाको विमानको अचानक निरीक्षण गरेको छ। जसले यी कमजोरीहरु प्रकट गरेको हो।
मिडिया रिपोर्टका अनुसार जनवरीमा एयर इन्डियाको विमानमा हरेक निरीक्षणका क्रममा फाइन्डिङ रेसियो १.९६ पुगेको थियो। त्यसपछि कोलोनमा रहेको एजेन्सीले भारतको उड्डयन नियामक डीजीसीएलाई जानकारी गराएको थियो। एजेन्सीले पछि एयर इन्डियाको विमानको निरीक्षणलाई तीव्र बनाएको छ।
यदि यो अनुपात २ भन्दा माथि बढ्यो भने यसले युरोपमा एयर इन्डियाको सञ्चालनलाई असर गर्न सक्छ। जुन यसको प्रमुख अन्तर्राष्ट्रिय बजारहरुमध्ये एक हो। यसले एयरलाइन्सको विमानको छानबिन बढाउनेछ र केही देशहरुले प्रतिबन्धहरु पनि लगाउन सक्छन्।
डीजीसीएका एक वरिष्ठ अधिकारीका अनुसार युरोपेली देशहरुमा यसको सञ्चालन प्रभावित नहोस् भनेर एयर इन्डियाको सुरक्षा त्रुटिहरुलाई सम्बोधन गर्न तत्काल कदम चालिएको छ।
समस्या के हो ?
डीजीसीएका ती अधिकारीका अनुसार बढ्दो निरीक्षणपछि एयर इन्डियामा सुरक्षा कमजोरीहरुको संख्या गत हप्ता घट्यो। यो रेसियो १.७६ मा झर्यो। उच्च सुरक्षा रेकर्ड भएका एयरलाइन्सहरुको रेसियो सामान्यतया १ भन्दा कम हुन्छ।
विदेशी विमानको सुरक्षा मूल्यांकन (एसएएफए) कार्यक्रमअन्तर्गत ईएएसए निरीक्षकहरुले युरोपेली विमानस्थलहरुमा गैरईयू एयरलाइन्सको विमानहरुको अचानक निरीक्षण गर्छन्। आपतकालीन निकास र लाइफ ज्याकेटजस्ता सुरक्षा उपकरणहरुसहित लगभग ५४ प्यारामिटरहरुमा विमानहरु जाँच गरिन्छ। –एजेन्सी
