इन्स्योरेन्स खबर, काठमाडौं, वैशाख २० । मुस्ताङका स्याउको मौसम सूचकाङ्क बीमा कार्यक्रम शुरु भएको छ । निर्जीवन बीमा कम्पनीमध्येको अग्रणी शिखर इन्स्योरेन्स कम्पनीले यूके एडको सक्षम परियोजनाको सहयोगमा उक्त बीमा योजना शुरु गरेको हो ।
मुस्ताङका स्याउ किसानलाई लक्षित गरी ल्याइएको उक्त बीमा कार्यक्रमको मंगलबार बीमा समितिका अध्यक्ष चिरञ्जीवी चापागाईंले उद्घाटन गरे ।
उक्त कार्यक्रमअन्तर्गत शिखर इन्स्योरेन्सले मार्फामा रहेको मौसम स्टेशनले उपलब्ध गराएको डाटाका आधारमा क्षतिपूर्ति प्रदान गर्नेछ । जसअन्तर्गत जेठ र असार महीनामा ४० मिलिलिटरभन्दा कम वर्षा भयो भने किसानले क्षतिपूर्ति दाबी गर्न पाउनेछन् ।
त्यस्तै उक्त बीमा कार्यक्रमले असिना पानीबाट हुने हानि नोक्सानीको पनि क्षतिपूर्ति प्रदान गर्ने बताइएको छ । यो बीमामा सहभागी हुन कृषकले मौसम सूचकाङ्कका लागि २ प्रतिशत र असिनापानीका लागि शून्य दशमलव २५ प्रतिशत प्रिमियम तिर्नुपर्ने छ ।
शिखर इन्स्योरेन्सले एक हजार पाँच सयओटा मौसम सूचकाङ्क बीमासम्बन्धी पोलिसी जारी गरिसकेको जानकारी दिएको छ । यस परियोजना अन्तर्गत ८ करोड ९० लाख रुपैयाँ बराबरका ४१ हजार ३ सय ९७ ओटा स्याउका रूखको बीमा गरिएको बताइएको छ ।
मुस्ताङमा शिखरको शाखा सञ्चालन गर्नुअघि नै छ सय स्याउका रूखको बीमा गरिसकेको पनि बताइएको छ । सन् २०१६ मा सक्षम परियोजनाले पहिलोपटक जुम्लाका स्याउ कृषकलाई यस्तो बीमाको शुरु गरेको थियो ।
मुस्ताङ र जुम्लाका साथै मुगु, कालिकोट र डोल्पामा पनिसक्षम परियोजनाले यस्तो कार्यक्रम गर्दै आएको छ ।
