काठमाडौं । शेयर बजारमा बैंकिङ सेक्टरबाहेक अन्य सबै क्षेत्रको बजार पुँजीकरण बढेको पाइएको छ। नेपाल राष्ट्र बैंकले सार्वजनिक गरेको चालु आर्थिक वर्षको फागुनसम्मको तथ्यांकले यस्तो देखाएको हो।
तथ्यांकअनुसार नेप्सेमा बीमा कम्पनीहरुको बजार पुँजीकरण पछिल्लो १ वर्षमा ३९.२ प्रतिशतले बढेको छ। अघिल्लो वर्ष फागुनसम्म बीमा कम्पनीहरुको बजार पुँजीकरण ३ खर्ब ८१ अर्ब ९१ करोड रुपैयाँ रहेकोमा चालु आर्थिक वर्षको फागुनसम्म बढेर ५ खर्ब ३१ अर्ब ६४ करोड रुपैयाँ पुगेको छ।
यो एक वर्षको अवधिमा उत्पादन तथा प्रशोधन र होटेल समूहको लगानीकर्ताको सम्पत्तिमा उछाल आएको छ। यी दुवैको बजार पुँजीकरण क्रमशः ९२.६ प्रतिशत र ८०.६ प्रतिशतले बढेको छ। अघिल्लो वर्ष फागुनसम्म उत्पादन तथा प्रशोधन समूह बजार पुँजीकरण १ खर्ब ९ अर्ब ६ करोड रुपैयाँ रहेकोमा समीक्षा अवधिसम्म बढेर २ खर्ब १० अर्ब ३ करोड रुपैयाँ पुगेको छ भने होटेल समूहको बजार पुँजीकरण ५३ अर्ब ५९ करोड रुपैयाँबाट बढेर ९६ अर्ब ७८ करोड रुपैयाँ पुगेको छ।
पछिल्लो एक वर्षको अवधिमा बजार पुँजीकरण विकास बैंकको १३.७ प्रतिशत, वित्त समूहको १५.८ प्रतिशत, लघुवित्त समूहको ६.४ प्रतिशत, व्यापार समूहको ३९.४ प्रतिशत, लगानी समूहको २८.९ प्रतिशत, जलविद्युत समूहको २५.४ प्रतिशत र अन्य समूहको १३.१ प्रतिशतले बढेको छ।
यो एक वर्षको अवधिमा बैंकिङ समूहको बजार पुँजीकरण भने ११.२ प्रतिशतले घटेको छ। अघिल्लो वर्ष फागुनसम्म बैंकिङ समूहको बजार पुँजीकरण ९ खर्ब ८१ अर्ब ६३ करोड रुपैयाँ रहेकोमा समीक्षा अवधिसम्म घटेर ८ खर्ब ७२ अर्ब ९ रुपैयाँमा खुम्चिएको छ।
पछिल्लो एक वर्षको अवधिमा नेप्सेको कुल बजार पुँजीकरण १७.४ प्रतिशतले बढेर ३३ खर्ब १४ अर्ब ६२ करोड रुपैयाँ पुगेको छ। अघिल्लो वर्ष फागुनसम्म नेप्सेको बजार पुँजीकरण २८ खर्ब २३ अर्ब ६७ करोड रुपैयाँ थियो।
