काठमाडौं । सरकारले लालीगुराँस बहुद्देश्यीय सहकारी संस्थाका बचतकर्तालाई अनलाइन मागदाबी पेस गर्न आह्वान गरेको छ।
समस्याग्रस्त सहकारी व्यवस्थापन समितिले आज एक सूचना प्रकाशित गर्दै ललितपुर पुल्चोकस्थित लालीगुराँस सहकारीका बचतकर्तालाई अनलाइन मागदाबी पेस गर्न आह्वान गरेको हो। का लागि ३५ दिनभित्रको समयसीमा दिइएको छ।
लालीगुराँस बहुउद्देश्यीय सहकारी संस्थालाई सहकारी ऐन, २०७४ को दफा १०४ बमोजिम समस्याग्रस्त घोषणा गरी सोही ऐनको दफा १०५ बमोजिम उक्त संस्थाको सम्पत्ति व्यवस्थापन तथा दायित्व भुक्तानीका लागि यस समिति समक्ष लेखी आएको सूचनामा उल्लेख छ। ‘सहकारी ऐन, २०७४ को दफा ११२ बमोजिम समस्याग्रस्त संस्था वा संघका सदस्य बचतकर्ता तथा साहुहरुलाई आफूले पाउनु पर्ने रकमको यस समितिको वेबसाइटमा गई सूचना प्रकाशित भएको मितिले ३५ दिनभित्र अनलाईन मागदावी आवेदन मार्फत स–प्रमाण दाबी पेस गर्न आह्वान गरिएको छ’, सूचनामा भनिएको छ।
गत फागुन २९ गते सहकारी विभागको सिफारिसमा भूमि व्यवस्था सहकारी तथा गरिबी निवारण मन्त्रालयले लालीगुराँस बहुउद्देश्यीय सहकारीलाई समस्याग्रस्त घोषणा गर्दै संस्थाको सम्पत्ति र दायित्व फर्छ्योट गर्न समितिमा पठाएको थियो।
