काठमाडौं । नेपाल रिइन्स्योरेन्स कम्पनीको बिक्रीमा राखिएको पौने २ लाख बढी कित्ता शेयरमा खरिद आवेदन दिने म्याद थप गरिएको छ।
ग्लोबल आइएमई क्यापिटलको स्वामित्वमा रहेको नेपाल रिको १ लाख ८७ हजार ४३४ कित्ता संस्थापक शेयरमा खरिद आवेदन दिने म्याद थप गरिएको हो। लिलामी प्रक्रियामार्फत बिक्रीमा राखिएको यो शेयरमा अब चैत २२ गतेसम्म बोलपत्र पेस गर्न सकिनेछ। यसअघि गत फागुन ८ गतेबाट यो शेयर विद्यमान संस्थापक शेयरधनीहरुका लागि बिक्रीमा राखिएको थियो। चैत १२ गतेसम्म आवेदन दिने म्याद रहेकोमा संस्थापक शेयरधनीहरुबाट खरिद आवेदन नपरेपछि म्याद थप गरिएको बिक्री प्रबन्धक ग्लोबल आइएमई क्यापिटलले जनाएको छ।
बिक्रीमा राखिएको शेयरको न्यूनतम मूल्य प्रतिकित्ता २८० रुपैयाँ तोकिएको छ। इच्छुक लगानीकर्ताले तोकिएको न्यूनतम मूल्य वा सोभन्दा बढी बोलकबोल गरी बोलपत्र पेस गर्नुपर्नेछ।
बोलपत्र काठमाडौंको नक्सालस्थित ग्लोबल आइएमई क्यापिटलको कार्यालयमा पेस गर्न सकिनेछ।
