काठमाडौं । बागमती प्रदेश सरकारले सहकारी संस्थाका ऋणी सदस्यहरुलाई आफूले लिएको ऋणको साँवा–ब्याज भुक्तानी गर्न आग्रह गरेको छ।
बागमती प्रदेश सरकारको संस्कृति, पर्यटन तथा सहकारी मन्त्रालयले एक सूचना जारी गर्दै यस्तो आग्रह गरेको हो। प्रचलित सहकारी ऐन, नियमावली, निर्देशिका एवं मापदण्डको बर्खिलाप नहुने गरी जुन सम्झौता वा सर्तबमोजिम ऋण लिएको हो, सोहीबमोजिम ऋणको साँवा–ब्याज भुक्तानी गर्न मन्त्रालयले आग्रह गरेको छ।
ऋणी सदस्यले समयमै ऋण भुक्तान नगरे सहकारी संस्थाको ऋण असुली सम्बन्धमा बागमती प्रदेश सहकारी ऐन, २०७६ को दफा ६५ र ६६ बमोजिम ऋणी सदस्यको खाता, जायजेथाको स्वामित्व हस्तान्तरण, नामसारी वा बिक्री गर्न नपाउने गरी रोक्का राख्न सम्बन्धित निकायमा लेखी पठाउन सकिने व्यवस्था रहेको मन्त्रालयले अवगत गराएको छ।
विभिन्न भ्रामक र गैरजिम्मेवारीपूर्ण अभिव्यक्तिका आधारमा ऋण चुक्ता नगर्ने परिपाटीले सदस्यहरुको बचत फिर्ता गर्न असहज परिस्थिति सिर्जना भएको भन्ने गुनासो प्राप्त भएको पनि मन्त्रालयले जनाएको छ।
