काठमाडौं । जिल्ला प्रशासन कार्यालय बैंकिङ क्षेत्रविरुद्ध भ्रम छर्नेलाई कारबाही गर्ने चेतावनी दिएको छ।
बर्दिया प्रशासनले एक सूचना जारी गर्दै यस्तो चेतावनी दिएको हो। बैंकिङ तथा वित्तीय संस्थाहरुविरुद्ध भ्रम छर्ने र कर्मचारीहरुलाई अपमान गर्दै लुकिछिपी विभिन्न प्रकारका दुर्व्यहार गर्ने प्रयत्न भइरहेको पाइएको छ’, सूचनामा भनिएको छ, ‘ त्यस्ता कार्यप्रति जिल्ला सुरक्षा समितिको गम्भीर ध्यानाकर्षण भएको छ।’
हाल केही समयदेखि बर्दिया जिल्लामा कथित संघ संस्था वा अभियानको नाममा भ्रमपूर्ण तथा धम्कीपूर्ण अभिव्यक्ति दिने, कानुनविपरीतका कार्य गर्ने/गराउने, नागरिक, राष्ट्रसेवक कर्मचारी तथा बैंक तथा वित्तीय संस्थाका कर्मचारीलाई अपमान र दुर्व्यवहार गर्ने प्रयत्न भइरहेकोतर्फ ध्यानाकर्षण भएको बर्दिया प्रशासनले जनाएको छ। ‘त्यस्ता आपराधिक गतिविधिमा संलग्न व्यक्तिलाई कानुनको दायरामा ल्याउन तथा जिल्लामा शान्ति सुरक्षा र सुशासन कायम राख हामी प्रतिबद्ध छौँ’, सूचनामा भनिएको छ।
शान्तिसुरक्षा र सुशासन कायम राख्ने कार्यमा आ–आफ्नो तह, क्षेत्रबाट सहयोग र सहकार्य गर्न तथा आपराधिक मनोवृत्तिलाई निरुत्साहित गर्न गराउन समयमै सूचना उपलब्ध गराई सचेत नागरिकको कर्तव्य निभाउन पनि जिल्लावासीहरुलाई बर्दिया प्रशासनले आग्रह गरेको छ।
