काठमाडौं । माघ महिनामा घरजग्गाको कारोबार बढेको छ। पुस महिनाको तुलनामा माघमा करिब ९ प्रतिशतले घरजग्गाको कारोबार बढेको हो।
भूमि व्यवस्थापन तथा अभिलेख विभागकाअनुसार माघमा ४९ हजार २९० वटा घरजग्गा कारोबार भएको छ। अघिल्लो महिना पुसमा ४५ हजार २७७ वटा घरजग्गा कारोबार भएको छ। यो हिसाबले घरजग्गाको कारोबार पुसको तुलनामा माघमा ८.८६ प्रतिशतले बढेको छ।
विभागका अनुसार सबैभन्दा धेरै जग्गाको कारोबार सुनसरीको भूमिसुधार तथा मालपोत कार्यालय इनरुवाबाट भएको छ। त्यहाँबाट २ हजार ३२ वटा घरजग्गा कारोबार भएको छ।
घरजग्गा कारोबार बढेसँगै सरकारले उठाउने राजस्व पनि बढेको छ। विभागका अनुसार माघमा घरजग्गाको कारोबारबाट कुल राजस्व ३ अर्ब ७१ करोड २८ लाख रुपैयाँ राजस्व संकलन भएको छ। जुन पुसको तुलनामा १५.८४ प्रतिशतले बढी हो। पुसमा घरजग्गा कारोबारबाट सरकारले ३ अर्ब २० करोड ५२ लाख रुपैयाँ उठाएको थियो।
