काठमाडौं । सागर डिस्टिलरीले प्रिमियम मूल्यमा शेयर बिक्री खुला गरेको छ। कम्पनीले आज एक सूचना प्रकाशित गर्दै प्रिमियम मूल्यमा शेयर बिक्री खुला गरेको हो।
कम्पनीको प्रथम वार्षिक साधारणसभाको निर्णयले कम्पनीको जारी पुँजीमध्ये १० लाख ४५ हजार कित्ता साधारण शेयर संस्थापक शेयरधनीहरुका लागि बिक्री खुला छ। बिक्रीमा राखिएको शेयर प्रतिकित्ता २०० रुपैयाँ तोकिएको छ। कम्पनीले अंकित मूल्य १०० रुपैयाँ प्रिमियमबापत १०० रुपैयाँ थप गरेको छ।
इच्छुक संस्थापक शेयरधनीले ३५ दिनभित्र शेयर खरिदका लागि कम्पनीको सञ्चालक समितिसमक्ष निवेदन पेस गर्नुपर्नेछ।
तोकिएको समयावधिभित्र संस्थापक शेयरधनीहरुबाट खरिद आवेदन नपरेको खण्डमा अन्य इच्छुक लगानीकर्तालाई कम्पनीमा लगानी गर्ने अवसर प्रदान गरी सोहीअनुरुप शेयर बाँडफाँड गरिने पनि कम्पनीले स्पष्ट पारेको छ।
