काठमाडौं । बरुण हाइड्रोपावर कम्पनीले चालु आर्थिक वर्षको दोस्रो त्रैमासको अपरिष्कृत वित्तीय विवरण सार्वजनिक गरेको छ। समीक्षा अवधिमा कम्पनीले ३ करोड ७३ लाख रुपैयाँ घाटा व्यहोरेको छ। अघिल्लो वर्ष यही अवधिमा कम्पनीले १ करोड ६५ लाख रुपैयाँ नाफा आर्जन गरेको थियो।
दोस्रो त्रैमासमा कम्पनीलाई १ करोड ७३ लाख रुपैयाँ सञ्चालन घाटा भएको छ। अघिल्लो वर्ष यही अवधिमा कम्पनीलाई ३ करोड ८० लाख रुपैयाँ सञ्चालन नाफा भएको थियो।
दोस्रो त्रैमासमा विद्युत उत्पादन ठप्प हुँदा कम्पनीले आम्दानी गर्न सकेन। अघिल्लो वर्ष विद्युत बिक्रीबाट कम्पनीले ५ करोड ९९ लाख रुपैयाँ आम्दानी गरेको थियो।
हेवा खोला साना जलविद्युत आयोजना स्थलमा गत असार २ गतेको बाढीले पूर्ण रुपमा क्षति पुर्याएको विद्युत उत्पादन कार्य सुचारु नहुँदा कम्पनीले आम्दानी गर्न नसकेको र सोही कारण घाटा व्यहोर्नुपरेको हो।
चुक्तापुँजी ५३ करोड ५८ लाख रुपैयाँ रहेको कम्पनीको रिटेन्ड अर्निङ २ करोड १२ लाख रुपैयाँले ऋणात्मक रहेको छ। अघिल्लो वर्ष रिटेन्ड अर्निङमा २ करोड ७२ लाख रुपैयाँ थियो।
कम्पनीको वार्षिक प्रतिशेयर आम्दानी (ईपीएस) १३.९४ रुपैयाँले ऋणात्मक रहेको छ। पीई रेसियो १८.३६ गुणाले ऋणात्मक रहेको कम्पनीको प्रतिशेयर नेटवर्थ १०४.२० रुपैयाँ रहेको छ।
