काठमाडौं । सर्वोत्तम सिमेन्ट लिमिटेडले श्रम स्वीकृति लिई वैदेशिक रोजगारीमा रहेका नेपालीलाई निष्काशन गरेको आइपीओ बाँडफाँड सम्पन्न गरेको छ । बिक्री प्रबन्धक ग्लोबल आइएमई क्यापिटलले आज बुधबार बिहान शेयर बाँडफाँड गरेको हो ।
उक्त आइपीओमा कुल ३३ हजार ८ सय २४ जनाको आवेदन परेको थियो । जसमध्ये १४ जनाको आवेदन रद्द भएको र कुल ३३ हजार ८ सय १० जना मात्र शेयर पाउन योग्य रहेका थिए । माग भन्दा बढीको आवेदन परेकोलेगोलाप्रथबाट शेयर बाँडफाँड गरिएको छ । जस अनुसार ५ हजार ३ सय ४० जनाले ५० कित्ताको दरले शेयर पाएका छन् । बाँकि आवेदक भने हात खाली भएको विक्री प्रबन्धकले जनाएको छ ।
सर्वोत्तम सिमेन्टले बुक विल्डिंग विधिबाट आइपीओ निष्काशन गरेको हो । बुक विल्डिंग मार्फत आइपीओमा न्युनतम ५० कित्ता शेयर बाँडफाँड गर्नु पर्ने व्यवस्था रहेकोले गोलाप्रथाबाट न्युनतम ५० कित्ता शेयर पर्ने गरि बाँडफाँड गरिएको हो ।
आइपीओको नतिजा बिक्री प्रबन्धक ग्लोबल आइएमई क्यापिटलको वेबसाइट, मेरोशेयर र सिडीएसले आईपीओ नतिजाको लागि संचालक गरेको वेबसाइटबाट हेर्न सकिन्छ ।
कम्पनीले पुस २५ गते देखि माघ १९ गतेसम्म श्रम स्वीकृति लिई वैदेशिक रोजगारीमा रहेका नेपाली नागरिकलाई २ लाख ६७ हजार कित्ता शेयर निष्काशन गरेको थियो । कम्पनीले प्रति शेयर ३६० रुपैयाँ ९० पैसामा निष्काशन गरेको हो ।
कम्पनीले हाल उद्योग प्रभावित स्थानीयलाई ९ लाख ३० हजार कित्ता शेयर निष्काशन गरिरहेको छ। उद्योग प्रभावित स्थानीयले माघ २५ गतेसम्म आवेदन दिन सक्ने छन् । त्यसपछि कम्पनीले सर्वसाधारणलाई शेयर निष्काशन गर्नेछ ।
