काठमाडौं । वर्ष २०२३ शेयर लगानीकर्ताको लागि मिश्रित वर्ष नै रह्यो । नेप्से परिसूचकको हिसाब गर्दा परिसूचक १ वर्षको अवधिमा करीब २ प्रतिशतमात्र वृद्धि हुन सफल भयो । वर्ष २०२२ मा २०२९.०३ को विन्दुमा बन्द भएको बजार वर्ष २०२३ मा २०६८.९० को विन्दुमा बन्द भएको छ ।
बजार २ प्रतिशतले वृद्धि भए पनि सबै सूचकमा एकै प्रकृतिको उतारचढाव देखिएन । १३ समूहगत परिसूचकमध्ये ११ परिसूचकमा वृद्धि देखियो भने २ परिसूचकमा गिरावट देखिएको छ ।
वर्ष २०२३ मा होटल तथा पर्यटन समूहको परिसूचकमा सर्वाधिक ९७.९२ प्रतिशतको वृद्धि देखिएकोमा दोश्रोमा व्यापार समूहको परिसूचकमा ४७.१० प्रतिशतको वृद्धि देखिएको छ ।
घट्नेमा दुई समूहगत परिसूचक छन् । वाणिज्य बैंकको उपसूचक र लघुवित्त समूहको उपसूचकमा गिरावट देखिएको छ । वाणिज्य बैंकको उपसूचक १२.७३ प्रतिशतले घट्दा लघुवित्त समूह १८.१९ प्रतिशतले घटेको छ ।
