काठमाडौं । कोरिया जानका लागि रोजगार अनुमति प्रणाली (ईपीएस) परीक्षा दिन नपाएपछि शुक्रबार प्रदर्शनमा उत्रिएकामाथि प्रहरीले गोली चलाउँदा एक युवकको मृत्यु भएको छ।
बालकुमारी भएको प्रदर्शनले उग्र रुप लिएपछि प्रहरीले गोली चलाएको हो। गोली लागेर गम्भीर घाइते भएका २३ वर्षीय सुजन राउतको किस्ट अस्पतालमा उपचारका क्रममा मृत्यु भएको प्रहरीले पुष्टि गरेको छ।
प्रहरीको गोली लागेर अर्का एक युवक गम्भीर घाइते भउका छन्। उनको पाटन अस्पतालमा उपचार भइरहेको प्रहरीले जनाएको छ। प्रदर्शनमा उत्रिएका युवाले भौतिक पूर्वाधारमन्त्री प्रकाश ज्वालाको चढेको गाडी रोकेर आगजनी गरेका थिए। उनीहरुले मन्त्री ज्वालालाई गाडीबाट बाहिर निकालेर गाडीमा आगो लगाएका थिए।
त्यसपछि युवाहरुको प्रदर्शनले उग्र रुप लिएको थियो। प्रदर्शन नियन्त्रणमा लिन प्रहरीले सुरुमा अश्रुग्यास प्रहार गरेको थियो। तर, स्थिति नियन्त्रण हुन नसक्दा प्रहरीले गोली चलाएको थियो।
