काठमाडौं । प्रति साधारण शेयर १०० रुपैयाँ अंकित मूल्यमा प्रिमियम बापत १०६ रुपैयाँ थपगरी प्रति कित्ता २०६ रुपैयाँमा आइपीओ निष्काशन गरेको हिमालयन रिइन्स्योरेन्स कम्पनीले सर्वसाधारणलाई आइपीओ निष्काशन गरी बाँडफाँड समेत गरिसकेको छ । अबको केही समयमा कम्पनीको आइपीओ धितोपत्र दोश्रो बजारमा सूचीकृत हुनेछ ।
कम्पनीले सार्वजनिक गरेको विवरण पत्र अनुसार कम्पनीले आर्थिक वर्ष ७८/७९ सम्मको वास्तविक वित्तीय विवरण सार्वजनिक गरेको छ । आर्थिक वर्ष ७९/८० को असार मसान्तसम्मको विवरण अपरिस्कृत वित्तीय विवरण भएकाले आर्थिक वर्ष ७८/७९ को प्रति शेयर नेट्वर्थको आधारमा कम्पनीले पहिलो कारोबारको रेञ्ज पाउने सम्भावना छ ।
कम्पनीको आर्थिक वर्ष ७८/७९ सम्मको प्रति शेयर नेट्वर्थ १०३ रुपैयाँ ०७ पैसा रहेको छ । सो नेट्वर्थको आधारमा कम्पनीले पहिलो कारोबारको लागि १०३ रुपैयाँ ०७ पैसा देखि ३०९ रुपैयाँ २१ पैसाको ओपनिङ्ग रेञ्ज पाउने सम्भावना छ । नेप्सेको स्पेशल प्री ओपनिङ्ग सेसनमा यो रेञ्जमा पहिलो कारोबार भए पश्चात् कम्पनीको शेयर नियमति सेसनमा आउने छ । नियमति सेसनमा कम्पनीको मूल्य १० प्रतिशतसम्म घटबढ हुन सक्नेछ । यसरी हेर्दा कम्पनीका आइपीओ लगानीकर्ताले पहिलो दिन नै आफ्नो सावा भन्दा माथि बजार मूल्य हेर्न पाउने सम्भावना रहेको छ ।
नोट : रेञ्ज गणना गर्दा कम्पनीको पछिल्लो वास्तविक प्रति शेयर नेट्वर्थको आधारमा गरिएको हो ।
